Azərbaycan, Bakı, 15 sentyabr / Trend , müxbir E.Ismayılov /
Yaxın zamanlarda ARDNŞ (Azərbaycan Respublikası Dövlət Neft Şirkəti) Türkiyə ilə Azərbaycanın "Şah Dəniz" yatağının işlənməsi çərçivəsində Azərbaycan qazının qiyməti məsələsi üzrə kommersiya sazişinin imzalanmasını planlaşdırır, çərşənbə axşamı ARDNŞ-in yüksək vəzifəli nümayəndəsi deyib.
"Yaxın zamanlarda qazın qiyməti üzrə kommersiya razılaşmasının imzalanmasını gözləmək olar, biz bu istiqamətdə müəyyən addımlar atırıq və bunu tezliklə həll etmək istəyirik", - mənbə deyib.
Mənbənin dediyi kimi, ARDNŞ və Türkiyə tərəfi arasında danışıqların sonuncu mərhələsi 11 sentyabrda keçirilib. Belə ki, ARDNŞ nümayəndələri Türkiyənin energetika və təbii sərvətlər naziri Taner Yıldızın başçılığı altında nümayəndə heyəti ilə görüşüblər. "Türkiyə tərəfi ilə hər görüşümüz hər iki tərəfin bu məsələ üzrə mövqeyinə aydınlıq gətirir", - neft şirkətinin nümayəndəsi əlavə edib.
ARDNŞ prezidenti Rövnəq Abdullayevin bir müddət əvvəl dediyi kimi, "Şah Dəniz" yatağının işlənməsinin birinci mərhələsi çərçivəsində Türkiyə üçün Azərbaycan qazının qiymətlərinə dair məsələlərin və texniki göstəricilərin, eləcə də layihənin ikinci mərhələsi çərçivəsində Türkiyə üçün ayrılmış həcm məsələsinin böyük hissəsi həll edilib. Azərbaycan və Türkiyə tərəfi tədricən qazın qiymətlərinin formulu məsələsinə dair ümumi mövqeyə yaxınlaşırlar. "Əsas problem qiymətlərin müəyyənləşdiriıməsi formuludur, bu planda Türkiyənin öz, bizin öz mövqeyimiz var. Lakin biz yavaş-yavaş mövqelərimiz yaxınlaşır", - Abdullayev əlavə edib.
Bu gün Azərbaycan qazı Türkiyəyə 1000 kub metrinə 120 dollar qiymətlə verilir. Bununla yanaşı, türkiyənin daxili bazarında istehlakçılar üçün qazın qiyməti hər 1000 kub metri üçün təxminən 380 dollardır.
Türkiyəylə imzalanmış müqavilədə göstərildiyi kimi, "Şah Dəniz" qazının qiyməti tədarükə başlayandan bir il sonra yenidən baxıla bilər, yəni yeni qiymətlər 2008-ci il aprelin 15-dən tətbiq ediləcək.
Müqaviləyə əsasən, Türkiyə layihənin işlənməsinin birinci mərhələsi çərçivəsində "Şah Dəniz" yatağından 6,6 milyard kub metr qaz almalıdır. Layihə üzrə tərəfdaşlar tədarükün bu həcminə bu il çatacaqlar.
"Şahdəniz" yatağının işlənməsinə dair müqavilə 1996-cı il iyunun 4-də imzlanıb. Layihə iştirakçıları bunlardır: BP (operator) -25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO- 9 faiz, ARDNŞ - 10 faiz.
Məqalə müəllifi ilə əlaqə ünvanı: [email protected]