Azərbaycan, Bakı, 25 sentyabr / Trend , müxbir E.İsmayılov /
Azərbycanın "Şahdəniz" yatağından planlaşdırılan proflaftik işlərə görə dayandırılan hasilat yaxın günlərdə yenidən başlayacaq. Hasilatla yanaşı, Cənubi Qafqaz qaz kəməri ilə (Bakı-Tbilisi-Ərzurum) qaz tədarükü də dayandırılıb.
"Hasilat platforma üçün zəruri olan avadanlığın xaricdən alınması və quraşdırılmasından sonra mümkün olacaq", - işlərə yaxın olan mənbədən deyilib.
Hasilatın dayandırılmasına qədər yataqda 4 quyu olub. Bir quyu qeyri-işlək vəziyyətdədir və təmirə ehtiyacı var. Bu quyunun əvvəllər də problemli olduğu üçün onun konservləşdirilməsi istisna edilmir.
"Şahdəniz" yatağında bu ilə proqnazlaşdırılmış hasilat 7,2 milyard kubmetr qaz təşkil edir. Əvvəllər BP şirkəti (layihənin operatoru) 7,7 milyard kubmetr səviyyəsində hasilat proqnozlaşdırmışdı. ARDNŞ nümayəndəsinin sözlərinə görə, ən yüksək hasilat (8,6 - 9 milyard kubmetr qaz) gələn il əldə olunacaq.
Platformanın dayandırılmasına qədər yatağın sutkalıq hasilatı 14-15 milyon kubmetr qaz təşkil edib. Qaz Cənubi Qafqaz boru kəməri ilə Türkiyə və Gürcüstana nəql edilib. Yay ərzində Azərbaycan "Şahdəniz" yatağından qaz əldə etməyib.
"Şahdəniz" dəniz yatağının işlənməsi müqaviləsi 4 iyun 1996-cı ildə imzalanıb. Razılaşmanın iştirakçıları BP (operator) (25,5%), Statoil Hydro (25,5%), NİCO (10%), Total (10%), LukAgip (10%), TPAO (9%) və ARDNŞ (10%) şirkətləridir.
Məqalə müəllifi ilə əlaqə ünvanı: [email protected]
