Azərbaycan, Bakı, 05 oktyabr / Trend /
ARDNŞ-nin gəmiləri "Yuri Korçagin" yatağına yeni neft rezervuarının nəqlini başa çatdırıb. Tutumu 28 min ton olan rezervuar Rusiyanın LUKoyl şirkətinin sifarişi ilə tikilib. Bu barədə ARDNŞ-dən bazar ertəsi yayılan məlumatda deyilir.
Yeni anbarın uzunluğu 132 metr, eni 32 metr, hündürlüyü isə 16 metrdir. İki hissədən ibarət olan rezervuar parkı Sinqapurda tikilib və Bakıya iki pontonla gətirilib. Yeni parkda montaj işləri 10 ay davam edib. Rezervuar parkı artıq dəniz qeydiyyatından keçib. Sifarişçi şirkət onu istismara götürüb.
"Yuri Korçagin" yatağının 2009-cu ilin dekabr ayında istismara verilməsi planlaşdırılır. Yataq Həştərxandan 180 kilometr, Mahaçqaladan isə 240 kilometr aralıda yerləşir. Yataqda dənizin dərinliyi 11-13 metr təşkil edir. Yatağın ehtiyatı 570 milyon barel olaraq dəyərləndirilir. Neft və qaz hasilatının maksimal həddi ildə 2,3 milyon ton və 1,2 milyard qaz təşkil edir.
Bundan əlavə, ARDNŞ "Zöhrab Vəliyev" adlı geoloji-mühəndis gəmisi isə Xəzər dənizinin Türkmənistan sektorunun "Banka Jdanova" strukturunda Dragon Oil şirkətinin sifarişi üzrə geoloji işləri davam etdirir.
Sahildən 17-20 kilometr aralıda yerləşən bu strukturda geoloji-mühəndis işləri həyata keçiriləcək.
