Azərbaycan, Bakı, 12 oktyabr / Trend , müxbir E.İsmayılov/
ARDNŞ və Gazprom Germania ZMB GmbH arasındakı "Neft Daşları" neft-qaz çıxarma idarəsinin sahələrində aşağı təzyiqli səmt qazının istifadə edilməsi üzrə layihənin reallaşdırılmasına dəstək çərçivəsində "Xidmətlərin göstərilməsinə dair razılaşma" müqavilənin ticari tərəfləri razılaşdırıldıqdan sonra imzalanacaq, ARDNŞ-in ekologiya məsələləri üzrə vitse-prezidenti Muxtar Babayev bazar ertəsi deyib.
Babayevin sözlərinə görə, Almaniya tərəfi bu obyektlərin mümkün olan bərpası üzrə öz təkliflərinin hazırlanmasına başlayıb.
"İş hələ müqavilə mərhələsinə gəlib çatmayıb. Məsələnin iki tərəfi də qane edəcək texniki hissələri var. Lakin ticari, maliyyə tərəfi də var və o hələ tamamlanmayıb. Maliyyə, ticari hissə hər iki tərəf üçün müsbət olarsa, əlbəttə ki, o zaman müqavilə imzalanacaq", - Babayev deyib.
"Hazırda tərəflər arasında danışıqlar davam edir. Hələlik müqavilənin dəqiq imzalanma tarixi məlum deyil", - Babayev deyib.
Bu layihənin reallaşdırılması çərçivəsində "Gazprom Germania" texniki dəstək göstərəcək. Layihə "Neft Daşları" və "Palçıq Təpəsi" yataqlarının sahələrindən səmt qazlarının toplanmasını nəzərdə tutur.
İki şirkət arasındakı bu razılaşma yayda nəzərdən keçirilib və müzakirə edilib. Müzakirələr "Gazprom Germania" şirkətinin ekspertləri Devib Qrayebe və Erik Veyqaltın Bakıya səfəri zamanı aparılıb.
Bu layihə təklifi ARDNŞ tərəfindən Almaniya şirkətinə təqdim edilib. ARDNŞ və "Gazprom Germania" arasında məxfilik haqda razılaşma imzalanıb.
Məqalə müəllifi ilə əlaqə ünvanı: [email protected]
