Azərbaycan, Bakı, 26 oktyabr / Trend , müxbir E.İsmayılov/
Heydər Əliyev adına Bakı Dərin Özüllər Zavodu "Günəşli" yatağının dayaz hissəsində yerləşəcək ikibloklu qaz-lift stansiyasının bloklarından birinin tikintisini başa çatdırmaq üzrədir. Bu barədə bazar ertəsi ARDNŞ-dəki mənbədən məlumat verilib.
ARDNŞ-nin "Neftqaztikinti" tresti stansiyanın birinci blokunun tikintisini artıq başa çatdırıb.
"Demək olar ki, işlərin 70 faizi artıq başa çatıb, ilin sonunadək tikinti prosesinin yekunlaşdırılması planlaşdırılır", - mənbədən deyilib.
Daha əvvəllər ARDNŞ-nin məlumatında deyilirdi ki, qaz-lift stansiyasının tikintisi bu ilin sonunda başa çatdırılacaq.
Yeni platformanın hündürlüyü 92 metrdir. Bu platformada "28 may" Neft-Qaz Çıxarma İdarəsinin qaz-lift sistemləri cəmlənəcək.
Bu platforma ARDNŞ-nin 2009-cu ildə qaz proqramı çərçivəsində istismara verəcəyi böyük obyektlərdən biridir.
Məqalə müəllifi ilə əlaqə ünvanı: [email protected]
