Türkmənistan, Aşqabad, 25 mart / Trend , müxbir H.Həsənov/
Braziliyanın Türkmənistandakı səfiri (qeyri-rezident) Frederiko Duke Estrada Meyer bu gün ölkənin Neft-Qaz Sənayesi və Mineral Ehtiyatlar Nazirliyinin rəhbərliyi ilə danışıqlar aparmağı planlaşdırır. Türkmən Dövlət Xəbərləri Xidmətinin (TDX) məlumatına görə, ötən gün nümayəndə heyəti Türkmənistan Məclisində (parlament), XİN, Kənd və Su Təsərrüfatları Nazirliyində görüşlər keçirib.
Tərəflər "nəzərəçarpacaq dərəcədə fəallaşan əməkdaşlığın yüksələn inkişaf xarakterini, o cümlədən, Türkmənistan ilə Latın Amerikası ölkələri arasında dinamik inkişaf edən dialoqu" qeyd ediblər.
İki ölkə nümayəndələri coğrafi baxımdan uzaqda yerləşmələrinə baxmayaraq, böyük imkanlara və perspektivlərə malik iki ölkə arasında ənənəvi qarşılıqlı fəaliyyətin hər vasitə ilə möhkəmləndirilməsində maraqlı olduqlarını" bildiriblər.
Qrafikə əsasən Meyer bu gün Tikinti Materialları Sənayesi Nazirliyində, Turizm və İdman üzrə Dövlət Komitəsində, həmçinin, "Türkmənhavayolları" Dövlət Xidmətində bəzi məsələləri müzakirə edəcək.
