Azərbaycan, Bakı, 19 aprel /Trend, müxbir E.İsmayılov/
ARDNŞ hazırda "Bakı-Novorossiysk" boru kəməri vasitəsilə sutkada 6,5 min ton neft nəql edir. Bu barədə bazar ertəsi neft-qaz bazarındakı mənbə bildirib.
"Hazırda "Bakı-Novorossiysk" kəməri vasitəsilə Rusiya istiqamətində sutkada 6,5 min ton neft nəql edilir", - mənbə deyib. Aprelə planlaşdırılan neftin ötürülməsi həcmi aprelin 28-də başa çatacaq.
Mənbənin əvvəlcə bildirdiyinə görə, bu ilin ikinci rübündə ARDNŞ "Bakı-Novorossiysk" kəməri vasitəsilə 600 min ton Azərbaycan nefti nəql edəcək. Birinci rübdə bu göstərici 450 min ton təşkil edib. Proqnozlara əsasən, apreldə neft kəməri vasitəsilə 215 min ton, mayda bu göstərici eyni olacaq, iyunda isə 170 min ton nəql ediləcək.
Birinci rüb ərzində 450 min ton neft nəql edilib. Bunun 130 min tonu yanvarda, fevral və martda isə bu neft kəməri vasitəsilə 160 min ton neft nəql edilib.
ARDNŞ "Bakı-Novorossiysk" neft kəməri vasitəsilə əvvəllər planlaşdırılan 1,8 milyon tona nisbətdə 2010-cu ildə 2,25 milyon ton neft nəql etməyi planlaşdırır.
Bu marşrut üzrə 2008-ci ildəki 1,2 milyon tona nisbətdə 2009-cu ildə təqribən 2,5 milyon ton neft nəql olunub.
ARDNŞ Novorossiysk vasitəsilə şəxsi yataqlarından hasil edilən neftin və Azərbaycanda quruda fəaliyyət göstərən birgə müəssisə və əməliyyat şirkətlərinin neftinin daşınmasını həyata keçirir.
Bu gün "Bakı-Novorossiysk" boru kəməri vasitəsilə neftin nəqli zamanı Azərbaycan Novorossiysk limanında Urals markalı neft əldə edir.
"Bakı-Novorossiysk" boru kəmərinin operatoru 2007-ci ilin sonunadək ABƏŞ olub, sonradan bu funksiyanı ARDNŞ-yə verib.
