ARDNŞ yolların kənarında yerləşən qaz kəmərlərinin maksimum təhlükəsizliyini təmin etməyi planlaşdırır

Azərbaycan, Bakı, 10 may /Trend, müxbir E.İsmayılov/

ARDNŞ (Azərbaycan Respublikası Dövlət Neft Şirkəti) qaz kəmərlərinin maksimum təhlükəsizliyini beynəlxalq standartlara uyğun təmin etməyi planlaşdırır. Bu barədə bazar ertəsi Qaz Emalı Zavodunda ümummilli lider Heydər Əliyevin büstünün açılışı mərasimində ARDNŞ prezidenti Rövnəq Abdullayev bildirib.

Abdullayevin sözlərinə görə, ölkənin qaz sisteminin yenilənməsi və yeni infrastrukturun yaradılması üzrə işlər aparılır.

Bakının və Abşeron rayonunun qaz sisteminin yenidən qurulması işləri çərçivəsində ARDNŞ mütəxəssislərindən ibarət böyük bir qrup qaz strukturunu öyrəndikləri Almaniya və Çexiyadadırlar.

Bundan əvvəl Bakının və Abşeron rayonunun qaz sisteminin yenidən qurulması layihəsi çərçivəsində RWE və E.ON Ruhrgas şirkətləri təklif təqdim ediblər.

"Hələlik təklif nəzərdən keçirilir. ARDNŞ şirkəti hələ son seçimini etməyib", - Abdullayev deyib.

Onun sözlərinə görə, ARDNŞ Bakının və Abşeron rayonunun qaz sisteminin yenidən qurulması işlərini sərbəst yerinə yetirməyi planlaşdırır. İlkin qiymətləndirmələrə görə, 2010-2015-ci illəri əhatə edən layihənin dəyəri bir milyard avrodan çoxdur.

"Yenilənmə mövcud sistemin hələ sovet dövründə yaranması və hazırda heç bir standarta uyğun gəlməməsi ilə əlaqədardır", - Abdullayev deyib.

ARDNŞ rəhbəri bildirib ki, beynəlxalq maliyyə institutları ilə layihənin həyata keçirilməsinə investisiyaların cəlb edilməsi üçün danışıqlar aparılır.