Azərbaycan, Bakı, 29 iyun /Trend, müxbir E.İsmayılov/
Azərbaycanın sənaye və energetika nazirinin müavini Natiq Abbasov və Polşanın xarici işlər nazirinin müavini Pavel Voysexovski Bakıda tərəflər arasında "Odessa-Brodı" neft boru kəməri layihəsi çərçivəsində əməkdaşlığı müzakirə ediblər. Bu barədə Sənaye və Energetika Nazirliyinin mətbuat xidmətinin rəhbəri Azər Mənsimli deyib.
Mənsimlinin sözlərinə görə, Abbasov görüşdə bəyan edib ki, Azərbaycan bu layihədə iştirak etməkdə, Avropa və Baltika ölkələri ilə əməkdaşlıqda maraqlıdır.
Görüş çərçivəsində Polşa tərəfi neftlə çirklənmiş ərazilərin təmizlənməsi üzrə "green" texnologiyasının təqdimatını keçirib.
"Odessa-Brodı" neft nəqli layihəsi neftin Ukrayna NEZ-inə çatdırılması və ölkənin tranzit imkanlarının artırılması məqsədilə planlaşdırılıb. "Odessa-Brodı" neft kəmərinin tikintisi 2002-ci ilin aprel ayında başa çatıb. Magistral 674 km uzunluğa malikdir və borunun diametri 1020 mm-dir. Neft kəməri və terminalın gücü il ərzində 9-14 milyon ton təşkil edir.
Bu marşrutda Azərbaycana əsas tədarükçü rolu ayrılır. Lakin Azərbaycan tranzit ölkə kimi də çıxış edə bilər. Odur ki, bu neft boru kəməri ilə Azərbaycan təkcə öz neftini deyil, eləcə də Mərkəzi Asiyanın, məsələn, Qazaxıstanın neftini tədarük edə bilər.