Azərbaycan, Bakı, 27 avqust /Trend, müxbir S.Süleymanov/
Qazaxıstan hökumətinin "Qaraçanaq" konsorsiumunun səhmdarları ilə danışıqları hələ də davam edir və tərəflər bu layihədə gələcəkdə respublikanın payının ölçüsü ilə bağlı razılığa gələ bilməyiblər. Bu barədə Neft və Qaz Nazirliyinin məsul katibi Kanatbek Safinov Trend-ə eksklüziv müsahibəsində bildirib.
"Bizim "Qaraçanaq" layihəsində respublikanın 10 faiz payı ilə bağlı razılığa gəlməyimiz barədə informasiya şayiədən və ya yalandan başqa bir şey deyil", - Safinov agentliyin müvafiq sualına cavab verib.
Xatırladaq ki, iki həftə əvvəl "Reyter" agentliyi məlumatlı mənbələrə istinadən, "Karachaganak Petroleum Operating B. V. (KPO)" beynəlxalq konsorsium iştirakçılarının Qazaxıstan hökumətinə respublikada ən iri Qaraçanaq neft-qaz kondensatı yatağının mənimsənilməsi layihəsində 10 faizlik payı güzəştə getməsi ilə bağlı razılığın əldə olunması barədə məlumat yaymışdı.
"Reyter"in məlumatına görə, bununla yanaşı, tərəflər belə qərara gəliblər: səhmlərin 5 faizi respublikanın əvvəllər konsorsiuma qarşı irəli sürdüyü 1 milyard dollarlıq iddiadan əl çəkəcəyi halda veriləcək, yerdə qalan 5 faizi isə Qazaxıstan nağd yolla alacaq.
"Beş faizin nağd alınması haqqında razılaşma olmayıb. Danışıqlar gedir və hələlik başa çatmayıb, yekun qərar qəbul olunmayıb", - Safinov deyib.
Xatırladaq ki, "Qaraçanaq" neft-qaz kondensat yatağının mənimsənilməsi üçün yaradılan KPO konsorsiumuna İtaliyanın "Eni" və Britaniyanın "British Gas" (şirkətlərin hər birinin payı 32,5 faiz təşkil edir) daxildir. KPO səhmlərinin daha 20 faizi "Chevron" və 15 faizi isə Rusiyanın "Lukoyl" şirkətinə məxsusdur.
Qazaxıstan Beynəlxalq Arbitraj Məhkəməsinə "BG" və "Eni"dən 1,3 milyard dollar tələbi ilə müraiət edib. Bu, həmin məbləğdə fırıldaqçılıqda şübhəli bilinən konsorsium rəhbərlərinə qarşı cinayət işinə xitam verildikdən sonra baş verib.
1,2 milyard ton neft və 1,35 trilyon kubmetr qaz ehtiyatlarına malik "Qaraçanaq" yatağı dünyada fəaliyyətdə olan ən iri neft-qaz kondensat yataqlarından biridir. "Qaraçanaq"da Qazaxıstanda hasil olunan qazın 49 faizə yaxını və bütün neftin 18 faizi çıxarılır.
