Azərbaycan, Bakı, 19 yanvar /Trend/
2010-cu ildə Azərbaycanda 50,83 milyon ton neft və kondensat hasil olunub ki, bu da 2009-cu ilin analoji göstəricisindən 0,9 faiz çoxdur. Bu barədə Azərbaycan Dövlət Statistika Komitəsi məlumat verib.
Ötən il hasil olunan neftin əsas həcmi qeyri-dövlət sektorunun, eləcə də Azərbaycan Beynəlxalq Əməliyyat Şirkətinin və "Şahdəniz" konsorsiumunun payına düşür. Onlar "Azəri-Çıraq-Günəşli" dəniz yataqları blokundan və "Şahdəniz" qaz-kondensat yatağından 43,61 milyon ton neft və qaz kondensatı hasil ediblər ki, bu da 2009-cu ilin göstəricisindən 1,1 faiz çoxdur.
2010-cu ildə Azərbaycanda qaz hasilatı 26,23 milyard kubmetr təşkil edib ki, bu da 2009-cu ildə olduğundan 11,2 faiz çoxdur. Respublikada hasil olunan qazın ümumi həcmindən əmtəə qazının payına 16,67 milyard kubmetr düşüb ki, bu da 2009-cu ildə olduğundan 2,1 faiz çoxdur. 6,3 milyard kubmetrdən artıq əmtəə qazı dövlət sektorunun payına düşür, 10,33 milyard kubmetrə yaxın qaz isə xarici şirkətlərlə birgə hasil olunub.
2010-cu ildə Azərbaycanda 18,4 milyard kilovatt-saat elektrik enerjisi istehsal olunub, bu da 2009-cu ildəkindən 2,5 faiz azdır.
