Azərbaycan, Bakı, 2 aprel /Trend, müxbir E.İsmayılov/
2013-cü ilin birinci yarısında ARDNŞ Bakı yaxınlığında yeni gəmiqayırma və gəmi təmiri zavodunun tiktisini və ilk gəminin suya buraxılmasını planlaşdırır. Trend-in məlumatına görə, bu barədə şənbə günü şirkətin prezidenti Rövnəq Abdullayev deyib.
Onun sözlərinə görə, artıq zavodun tikintisi çərçivəsində tender elan edilib, bütün tender sənədləri hazırlanıb. Aprel ayı ərzində tenderin yekunlaşdırılması planlaşdırılır.
Abdullayevin sözlərinə görə, yeni gəmiqayırma zavodu Azərbaycan və Xəzəryanı ölkələrin gəmilərə olan ehtiyacını təmin etməyə imkan verəcək. Lakin, ilk növbədə, müəssisədə istehsal olunacaq gəmilər Azərbaycanın öz dəniz donanmasının yenilənməsinə yönəldiləcək.
Zavodun tikintisində investisiya həcmi 450 milyon dollar təşkil edir.
"Bakı Gəmiqayırma Zavodu" MMC-nin yaradılmasına dair təsis müqaviləsini ARDNŞ prezidenti Rövnəq Abdullayev, Azərbaycan İnvestisiya Şirkətinin direktoru Əfqan İsayev və "Keppel" şirkətinin baş icraçı direktoru Tonq Çonq Xeonq imzalayıb.
Müqaviləyə əsasən, müəssisədə pay bölgüsü bu şəkildə bölüşdürüləcək: ARDNŞ - 65 faiz, AİŞ - 25 faiz, "Keppel" - 10 faiz.
"Keppel" sonrakı 3 il ərzində öz payını daha 10 faiz artırmaq hüququnu da əldə edib.
Yeni zavodun təməlqoyma mərasimi cari il martın 19-da Azərbaycan Prezidenti İlham Əliyevin iştirakı ilə olub.
Hazırda Britaniyanın "Royal Haskoning" və Niderlandın TT şirkətləri layihələşdirmə işlərini həyata keçirirlər. Ərazidə paralel şəkildə tikintiyə başlamaq üçün hazırlıq işləri aparılır.
Zavodun gücü ildə 25 min ton dəmir konstruksiya təşkil edir. Layihənin əsas məqsədi Xəzər dənizində tələbatı təmin etmək üçün lazımi gəmilərin tikintisidir.
