Azərbaycan, Bakı, 19 aprel /Trend, müxbir E.İsmayılov/
Yaxın vaxtlarda ARDNŞ (Azərbaycan Respublikası Dövlət Neft Şirkəti) Bakıda iki yanacaqdoldurma məntəqəsini (YDM) istismara verməyi planlaşdırır. Bu barədə çərşənbə axşamı Trend-ə ARDNŞ-dəki mənbə məlumat verib.
Onun sözlərinə görə, ilk növbədə Lökbatan qəsəbəsində, daha sonra isə Bakı-Sumqayıt yolunun 14-cü kilometrliyində yerləşən stansiyanı istismara vermək planlaşdırılır.
"Yaxın vaxtlarda bu stansiyalar istismara veriləcək", - mənbə bildirib.
Hazırda Azərbaycanda ARDNŞ-nin (Azərbaycan Respublikası Dövlət Neft Şirkəti) brendi altında işləyən yanacaqdoldurma məntəqələrinin (YDM) ümumi sayı səkkiz ədəddir.
Ümumilikdə ARDNŞ Azərbaycanda 30-a yaxın YDM açmağı planlaşdırır. Stansiyaların respublikanın giriş və çıxış yollarında tikilməsinə böyük diqqət ayrılır. Azərbaycanda YDM-lərin inşasına qoyulan investisiyalar 20 milyon manat təşkil edir.
"SOCAR Petroleum"un səhmdarları ARDNŞ (51 faiz) və ABŞ-ın "A.P. International" (49 faiz) şirkətidir. "SOCAR Petroleum" 2008-ci il yanvarın 21-də qeydiyyatdan keçib.
Hazırda ARDNŞ Gürcüstanda 60-dən çox yanacaqdoldurma məntəqəsinə malikdir, Ukraynanın neft məhsullarının pərakəndə satış bazarında işə başlayır, eləcə də Rumıniyada YDM-lərin açılması üzrə iş aparır.
