Azərbaycan, Bakı, 21 noyabr /Trend, müxbir E.İsmayılov/
Azərbaycan yanvar-oktyabrda "Şahdəniz" qaz-kondensat yatağından 1,75 milyard kubmetrdən çox qaz alıb. Ötən ilin analoji dövründə bu rəqəm 1,71 kubmetrə bərabər olub. Bu barədə bazar ertəsi Trend-ə ARDNŞ-dən məlumat veriblər.
Yanvar-oktyabrda əldə edilən qazın 405,5 milyon kubmetri ARDNŞ-nin "Şahdəniz" layihəsindəki iştirak payına düşür, bu yataqdan qalan təxminən 1,35 milyard kubmetr qaz isə ARDNŞ tərəfindən alınıb.
2010-cu ildə Azərbaycan "Şahdəniz" qaz-kondensat yatağından təxminən 2,2 milyard kubmetr qaz əldə edib. 2009-cu ildə bu göstərici təxminən 1,3 milyard kubmetr təşkil edib. 2010-cu ildə əldə edilmiş ümumi qazın həcmindən 557,4 milyon kubmetri ARDNŞ-nin "Şahdəniz" layihəsindəki iştirak payına düşüb, bu yataqdan qalan 1,6 milyard kubmetrdən çox qaz isə ARDNŞ tərəfindən alınıb.
Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, "Statoil" - 25,5%, NICO - 10%, "Total" - 10%, "LUKoil" - 10%, TPAO - 9%, ARDNŞ - 10%.
Hazırda qaz Cənubi Qafqaz qaz kəməri vasitəsilə Gürcüstan və Türkiyəyə nəql edilir.