Azərbaycan, Bakı, 29 mart /Trend, müxbir İ.Xəlilova/
2012-ci ilin əvvəlindən neft və qaz satışından Azərbaycan Respublikası Dövlət Neft Fonduna (ARDNF) daxilolmalar 4,06 milyard dollar təşkil edib. Bu, həmin dövrə olan proqnoz göstəricisini 30 faiz üstələyir. Bu barədə cümə axşamı Trend-ə Fonddan bildiriblər.
"Martın 27-nə olan vəziyyətə görə neft və qaz satışından Neft Fonduna daxilolmalar 4,06 milyard dollar təşkil edib ki, bu da həmin dövr üçün proqnozlaşdırılan səviyyəni 930 milyon dollar və ya 30 faiz üstələyir", - Fonddan qeyd ediblər.
Neft Fondunun gəlirlərinin belə artımı dünya bazarlarında neftin qiymətinin artması ilə izah edilir. 2012-ci ilin büdcəsi tərtib edilərkən ARDNF-in gəlirləri bir barel neftin qiyməti 80 ABŞ dolları hesabı ilə formalaşdırılıb.
"Nəzərə alsaq ki, neftin satıldığı fyuçers müqavilələrinin şərtlərinə əsasən, neft və qaz satışından əldə edilən valyuta satış tarixindən 1 ay sonra daxil olur, bu zaman cari ilin ötən dövrü ərzində neftin qiyməti əvvəlki ilin dekabrını əhatə edir. Bu, nəzərə alınmaqla 2011-ci il dekabr-2012-ci il fevral ayı ərzində orta ixrac qiyməti 110 ABŞ dolları təşkil edib", - Neft Fondundan deyiblər.
CIF bazisi üzrə İtaliyanın Auqusta limanı şərtləri ilə Azərbaycanın yüngül neftinin qiyməti martın 28-də 127,88 dollar/barel təşkil edib. FOB bazisi üzrə Türkiyənin Ceyhan limanı şərtləri ilə Azərbaycanın yüngül neftinin qiyməti martın 28-də 126,94 dollar/barel təşkil edib. "Azeri Light" neft növü Azərbaycanın "Azəri-Çıraq-Günəşli" yataqlar blokundan çıxarılır. Neft digər növlərlə qarışdırılmadan Bakı-Tbilisi-Ceyhan boru kəməri ilə Türkiyənin Ceyhan, dəmiryolla Gürcüstanın Batumi limanlarına çatdırılır. Bununla yanaşı, "Azeri Light" Bakı-Supsa kəməri ilə Gürcüstanın Supsa limanına ixrac olunur.
Azərbaycan neftin URALS növünü Novorossiysk limanından satır. Buraya xammal Bakı-Novorossiysk boru kəməri ilə çatdırılır. Novorossiysk limanından yüklənən URALS neftinin qiyməti martın 28-də 120,42 dollar/barel təşkil edib ki.
Büdcə parametrləri, dünya bazarlarında cari qiymətlər müəyyənləşdirilən zaman neftin qiymətləri üzrə proqnozların xeyli yüksəlməsinə baxmayaraq, Neft Fondunda ARDNF-in gəlir və xərclər hissəsinin yenidən baxılmasına zərurət görmürlər.
ARDNF-in gəlirləri 2012-ci il üçün 10 697 030,6 min manat, xərcləri isə 10 751 304 min manat səviyyəsində təsdiqlənib.
Dövlət Neft Fondunun 2012-ci il büdcəsinin gəlirləri - Azərbaycanın payına düşən karbohidrogenlərin satışından əldə edilən xalis gəlirləri 10 365 432,0 min manat, sərmayəçilərin akrhesabı ödənişləri 3 342,8 min manat, Azərbaycan ərazisi ilə neft-qaz nəqlindən gəlirlər 8 137 min manat, Fondun aktivlərinin yerləşdirilməsindən və idarə olunmasından əldə edilən gəlirlər 319 218,8 min manat və digər xərclər 900 min manat məbləğində nəzərdə tutulub.
ARDNF-in büdcəsinə əsasən, 2012-ci ildə dövlət büdcəsinə transfertlər 9 905 milyon manat həcmində, Samur-Abşeron suvarma sisteminin yenidən qurulması layihəsinin maliyyələşdirilməsi 200 milyon manat, Bakı-Tbilisi-Qars yeni dəmiryolunun tikintisi 252 484 min manat, Azərbaycan gənclərinin xarici ölkələrdə təhsili üzrə Dövlət Proqramının reallaşdırılması 20 milyon manat həcmində proqnozlaşdırılır.
Qaçqınların və məcburi köçkünlərin sosial-məişət şəraitinin yaxşılaşdırılması üzrə tədbirlərin maliyyələşdirilməsinə çəkilən xərclərin 300 milyon manat həcmində olacağı gözlənilir.
Neft Fondunun idarə edilməsinə çəkilən xərclər 73 820 min manat səviyyəsində olacaq.
ARDNF-in aktivləri ötən ilin əvvəli ilə müqayisədə (22 milyard 766,8 milyon dollar) 30,9 faiz artaraq, 2012-ci il yanvarın 1-nə 29,8 milyard dollar təşkil edib.
