Azərbaycan, Bakı, 3 aprel /Trend, müxbir S.Ağayeva/
Azərbaycan qazının Ukraynaya tədarükü layihəsinin iqtisadi rentabelliyini qiymətləndirmək üçün mayın sonunadək iki ölkə arasında enerji sahəsində işçi qrupu toplaşacaq. Trend-in məlumatına görə, bu barədə çərşənbə günü Ukraynanın Azərbaycandakı səfiri Aleksandr Mişenko mətbuat konfransında deyib.
Bu barədə razılıq Ukraynanın energetika və kömür sənayesi naziri Eduard Stavitskinin Azərbaycana sonuncu səfəri zamanı əldə edilib.
"Azərbaycan tərəfi hər il hasil ediləcək qazın həcmlərini müəyyənləşdirməlidir. Burada məqsəd tədarük və nəqlin həcmini hesablamaqdır. Məhz bu zaman hər hansı sazişi imzalamağa yaxın ola bilərik", - səfir qeyd edib.
Onun sözlərinə görə, Ukrayna Odessa ərazisində LNG terminal tikməyi planlaşdırır.
"Ukrayna Avropaya enerji resurslarının tədarükü üzrə infrastruktur layihələrin (AGRI layihəsi, Azərbaycandan və ya digər mənbədən qaz tədarükü üzrə layihələr) inkişafında öz iştirakını nəzərdən keçirməyə hazırdır. Biz öz terminalımızı tikirik, mənbəni isə axtaracağıq. Əgər Azərbaycan bu sahədə əməkdaşlıq etməyə hazır olsa, biz bunu yalnız alqışlayacağıq", - Mişenko deyib.
Səfir deyib ki, Azərbaycan tərəfi istəsə, LNG terminalının tikintisi layihəsində iştirak edə bilər.
2010-cu ildə Azərbaycandan Ukraynaya emal üçün göndərilən neftin tədarükü 10 milyon ton olub. "Lakin şirkətlərimiz belə qənaətə gəliblər ki, bu tədarüklər olduqca bahalıdır və rentabelli deyil. Hazırda hər şeyi hesablamaq lazımdır və ekspertlər enerji sahəsində gələcək əməkdaşlığı müzakirə edirlər", - səfir qeyd edib.
Onun sözlərinə görə, yekun qərar iki ölkənin energetika nazirlərindən asılı olacaq. Nazirlərə ekspertlərin apardıqları işlərin nəticələri təqdim ediləcək.
"İki ölkə arasında enerji sahəsində əməkdaşlıq yaxşı qurulub. Hazırda ARDNŞ-nin Ukraynada 30-dan çox yanacaqdoldurma məntəqəsi var və biz şirkətin işindən razıyıq", - Mişenko bildirib.
