Azərbaycan, Bakı, 5 iyun /Trend, müxbir E.İsmayılov/
İyunun 1-nə olan məlumata əsasən, Azərbaycan "Azəri-Çıraq-Günəşli" (AÇG) neft-qaz yataqları blokundan 178,8 milyon ton mənfəət nefti ixrac edib.
Trend-in məlumatına görə, bunu ARDNŞ-nin geologiya, geofizika və yataqların işlənməsi üzrə birinci vitse-prezidenti Xoşbəxt Yusifzadə cümə axşamı Bakıda XXI Azərbaycan Beynəlxalq Xəzər Neft və Qaz - 2014 (Caspian Oil&Gas) konfransında deyib.
Onun sözlərinə görə, bu layihə çərçivəsində Azərbaycanın mənfəət neftinin payı artır. Belə ki, 2013-cü ildə blokda hasilatın həcmi 32,7 milyon ton olub, bu həcmdən 22,5 milyon ton (68,8 faiz) mənfəət neftinin payına düşüb.
Qeyd edək ki, iyunun 1-nə olan məlumata əsasən, AÇG-də hasil edilən 347 milyon ton neft dünya bazarlarına ixrac edilib.