Rusiyanın "Qazeksport" MMC ("Qazprom" ASC-nin törəmə qurumu) Dağıstan ərazisindən keçən magistral qaz kəmərlərində kompleks plan-profilaktik və təmir işlərinin görülməsi səbəbindən bu gündən Azərbaycana qaz tədarükünü tamamilə dayandırıb. Bu barədə Trend ə yanacağın alıcısı qismində çıxış edən ARDNŞ-dən xəbər verilib.
"Dünən şirkət boru kəməri ilə yanacaq tədarükünü asta templərlə azaldıb, bu gün isə ixracı dayandırıb. Tədarük müvəqqəti olaraq dayandırılıb və avqustun 24-də bərpa olunacaq", - deyə ARDNŞ-dən bildiriblər.
Yanvar-iyul aylarında "Qazeksport" Azərbaycana 2 mlrd. 670,3 mln. kubmetr qaz tədarük edib. Cari ildə ARDNŞ "Qazeksport"dan 1 min kub metri 110 ABŞ dollarına təxminən 4,5 mlrd. kubmetr qaz almağı planlaşdırır.
"Mazut resurslarının səmərəli ehtiyatları olduğundan, qaz tədarükünün dayandırılması "Azərenerji"nin işinə və elektrik enerjisinin hasilatına təsir göstərməyib", - deyə ARDNŞ-dən bildiriblər.