"Azərbaycan Qaz Emalı" SC (Azərbaycan qaz emalı zavodu) 2006-cı ilin yanvar-avqust aylarında 1,772 mlrd. kubmetr qaz emal edib, 2005-ci ilin analoji dövründə isə bu göstərici 1,85 mlrd. m3 təşkil edib. Bu barədə Trend ə zavoddan məlumat verilib.
Beləliklə, zavod hesabat dövründə qaz emalını bir qədər - 72 mln. m3 azaldıb.
Zavoddan həmçinin bildirilib ki, 2006-cı ilin avqust ayında 255,56 mln. m3 qaz emal edilib, 2005-ci ilin avqust ayında isə bu göstərici 242,4 mln. m3 təşkil edib. 2005-ci ilin avqust ayına nisbətən 2006-cı ilin avqust ayında emal 5,4% artıb.
Azərbaycan qaz emalı zavodu 1961-ci ildə istismara verilib. Altı qaz emalı qurğusundan başqa qaz kondensatının emalı (ildə 675 min ton gücə malik) və qeyri-sabit benzinin fraksiyalaşdırılması (ildə 600 min ton) üzrə qurğular da quraşdırılıb. Layihədə nəzərdə tutulmuş texnologiya maye qaz, kerosin fraksiyası, ağır kondensat (neft emalı zavodları üçün xammal) və qaz benzini (Sumqayıtın neft-kimya kompleksi üçün xammal) əldə etməyə imkan verir. Əvvəllər Azərbaycan qaz emalı zavoduna qaz və kondensat Qaradağ yatağından daxil olurdu. Sonra xammal axınına Azərbaycan neftçiləri tərəfindən hasil edilən səmt və təbii qaz da qoşulub.
