"Azəriqaz" QSC-nin hazırda əhaliyə satdığı qazın qiyməti ölkənin Rusiyadan aldığı qazın qiymətindən iki dəfə azdır. "Gələn il üçün idxal olunan qazın qiyməti daha da arta bilər, ona görə qazın daxili qiymətinə yenidən baxılması mümkündür. Lakin bu məsələ ilə bağlı qərarı Tarif Şurası qəbul edəcək". Trend in xəbər verdiyi kimi, bunu oktyabrın 27-də mətbuat konfransında "Azəriqaz" QSC-nin sədri Əlixan Məlikov açıqlayıb.
Hazırda ARDNŞ "Qazeksport" ASC-dən qazın min kubmetrini 110 dollara alır. Azərbaycan əhalisi üçün qazın min kubmetri isə 55 dollaradır.
"2006-cı ilin yanvar ayında satılan qazın dəyərinin cəmi 16%-ni yığa bilmişik, sentyabrda isə bu göstərici 72,4%-ə çatıb. Bölgələrdə avqust və sentyabr aylarında həyata keçirdiymizin qazın kütləvi kəsilməsi burada müəyyən rol oynayıb. Qışın yaxınlaşmasına baxmayaraq, ödəniş səviyyəsi aşağı olan bölgələrdə biz qazın kütləvi kəsilməsini davam etdirəcəyik", - deyə Ə. Məlikov bildirib.
Azərbaycana qaz idxalına gəlincə, Ə. Məlikov bildirib ki, Rusiyadan qaz alınmasına davam etdiriləcəyi nəzərdə tutulur. "Amma çox şey Rusiyanın təklif edəcəyi qiymətdən asılı olacaq. Qiymət çox yüksək olsa, həcm azaldıla bilər. Bundan başqa, hökumət həmçinin İranla ildə 1,8-2 mlrd. kubmetr qazın idxalına dair danışıqlar aparır", - deyə QSC sədri bildirib.
"Azəriqaz" rəhbərinin sözlərinə görə, 2007-ci ildə həmçinin Ağcabədi və Beyləqan rayonlarının qazlaşdırılması nəzərə tutulub. Bundan sonra bütün ölkə "mavi yanacaq"la təmin olunmuş olacaq.
"Bu günlərdə ilk dəfə olaraq Lerik və Yardımlı rayonlarına qazın verilməsi təmin olunub. İndi yalnız Ağcabədi və Beyləqan rayonları qazlaşdırılmamış qalıb. Onları isə gələn il təmin edəcəyik", - deyə Ə. Məlikov bildirib.