Bakı. Trend:
Dairəvi iqtisadiyyat tullantıların minimuma endirilməsinə gətirib çıxara bilər və xətti “məhsulu götürdü - istifadə etdi - atdı” modelindən daha çox regenerativ yanaşmaya üstünlük verməyə dəyər.
Trend xəbər verir ki, bu barədə bu gün BMT-nin Azərbaycandakı daimi nümayəndəsi Vladanka Andreyeva Bakıda keçirilən "Yaşıl dünya naminə Həmrəylik: Dayanıqlı gələcək üçün tullantıdan dəyərə" adlı beynəlxalq forumda çıxışında deyib.
"Bu gün texnoloji tərəqqi tullantıların miqdarını əhəmiyyətli dərəcədə azaltmağa imkan verir, lakin tullantıların təkrar emalı proseslərinə daha çox investisiya lazımdır", - deyə o bildirib.
Həmçinin, onun fikrincə, tələbatın yaşıllaşdırılmasının təmin edilməsi son dərəcə vacibdir.
“İnstitutların, bizneslərin və ev təsərrüfatlarının davranışının dəyişdirilməsi resurs səmərəliliyinin artırılması, tullantıların azaldılması və çirklənmənin minimuma endirilməsinin açarıdır", - deyə o bildirib.
O, BMT-nin Azərbaycan hökumətinin tullantıların idarə olunmasının təkmilləşdirilməsi üzrə səylərini yüksək qiymətləndirdiyini bildirib.
Andreyeva xatırladıb ki, 2022-ci ildə tullantı sektoru qlobal metan emissiyalarının təxminən 23%-ni və təhlükəli istixana qazları olan azot oksidi emissiyalarının 5%-ni təşkil edib.
O xatırladıb ki, ötən il Azərbaycanın Ətraf Mühitin Mühafizəsi üzrə Fəaliyyətinin Üçüncü İcmalı başa çatıb, bərk tullantıların, çirkab suların, sənaye və kimyəvi tullantıların, məişət tullantılarının idarə olunması ilə bağlı tövsiyələr təklif edilib və müvafiq inteqrasiya strategiyalarına xüsusi diqqət yetirilib.
BMT-nin Azərbaycandakı Nümayəndəliyi bu keçidi səmərəli şəkildə inkişaf etdirmək üçün hökumət, özəl sektor və digər maraqlı tərəflərlə işləməyə hazırdır və sadiqdir.
Qlobal temperatur artımını 1,5 dərəcəyə qədər məhdudlaşdırmaq üçün BMT daxilində kollektiv fəaliyyət vacibdir. Bu məhdudiyyətlər daxilində qalmaq və Paris Sazişinin məqsədlərinə çatmaq üçün 2030-cu ilə qədər qlobal istixana qazı emissiyaları 2019-cu il səviyyələri ilə müqayisədə 43% azaldılmalı və 2050-ci ilə qədər CO2 emissiyalarının xalis sıfıra çatdırılması hədəflənməlidir.