Bakı. Trend:
Asiyada Qarşılıqlı Fəaliyyət və Etimad Tədbirləri üzrə Müşavirə (AQEM) təhlükəsiz və səmərəli qarşılıqlı əlaqəni təşviq etmək missiyasına sadiqdir.
Trend xəbər verir ki, bu barədə AQEM-in baş katibinin müavini Çjan Lin COP29 çərçivəsində keçirilən "Dayanıqlı əlaqəlilik yolları: Asiyada Qarşılıqlı Fəaliyyət və Etimad Tədbirləri üzrə Müşavirə (AQEM), onun üzv dövlətləri və Asiyanın regional təşkilatlarının təhlükəsiz, səmərəli və iqlim dəyişikliyinə davamlı nəqliyyat dəhlizlərinin təmin edilməsi istiqamətində səyləri" mövzusunda panel müzakirədə bildirib.
" AQEM-in təşəbbüsləri etimad tədbirlərinin beş əsas istiqamətini əhatə edir: iqtisadi, ekoloji, humanitar ölçülər, yeni çağırışlar və təhdidlər, eləcə də hərbi-siyasi ölçü. AQEM-ə üzv dövlətlər iqlim dəyişikliklərinə davamlı və səmərəli nəqliyyat dəhlizlərinin inkişafına xüsusi diqqət ayıraraq, iqtisadi və ekoloji ölçülərə əhəmiyyətli töhfələr verməyə çalışır", - o bildirib.
Onun sözlərinə görə, AQEM təhlükəsiz və səmərəli qarşılıqlı əlaqəni təşviq etmə missiyasına sadiqdir ki, bu da Asiyada dayanıqlı inkişafın təmin olunması üçün əsasdır.
"Üzv dövlətlərlə, regional təşkilatlarla və digər maraqlı tərəflərlə birlikdə çalışaraq, biz çağırışları fürsətlərə çevirə bilərik və regionumuz üçün daha işıqlı və qarşılıqlı əlaqəli bir gələcək təmin edə bilərik", - deyə Çjan Lin əlavə edib.
Qeyd edək ki, noyabrın 11-də BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) açılışı olub.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunub.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.