Azərbaycan, Bakı, 23 fevral / Trend , müxbir S.Babayeva / "Azərbaycan Hökumətindən, guya dövlət təminatı altında Azərbaycanın iki telekommunikasiya şirkətinə verilən kreditlərin ödənilməsini tələb edən Maltanın FIMBank-ı Rotterdam məhkəməsindən əlavə şahidlərin cəlb edilməsini xahiş edib", - bazar ertəsi Rabitə və İnformasiya Texnolоgiyaları Nazirliyindən (RİTN) bildiriblər. Azərbaycan Hökumətinin maraqlarının qorunması RİTN-ə tapşırılıb.
"Avqusta qədər onlar (məhkəmə) işin dinlənilməsi üzrə şahidləri müəyyən etməlidirlər", - nazirlikdən deyilib.
Buna qədər şahidlərin dinlənilməsi 2006-cı ilin dekabr ayı və 2007-ci ilin iyununda keçirilib.
Bir müddət əvvəl Rotterdam Məhkəməsi Maltanın FİMBank-ı (First International Merchant Bank Ltd) tərəfindən Azərbaycan Dövlətinə qarşı olan sənədləri kifayət qədər inandırıcı saymayıb. Məhkəmənin qərarına əsasən, FIMBank altı həftə ərzində maltalıların iddialarını sübut edən əlavə faktlar təqdim etməli idi. Bunun əvəzində bank məhkəməyə əlavə şahidlərin dinlənilməsini təklif edib.
RİTN öz tərəfindən bütün lazımı sənədləri təqdim edib, bu sənədlər arasında ən əsası isə Fransa məhkəməsinin Azərbaycanın xeyrinə qəbul etdiyi qərar olub.
RİTN-də bu addımı məhkəmə işinin uzadılması kimi qiymətləndirirlər.
Maltanın FIMBank-ı Azərbaycan Hökumətinə qarşı iddia və ümumi dəyəri 4,5 mln. dollar olan kreditləri ödəmək tələbi ilə çıxış edib. Bankdan bildirildiyinə görə, bu kreditlər dövlət təminatı altında Azərbaycanın iki telekommunikasiya şirkətinə verilib. FİMbank-ın ilk iddiası 2004-cü ilin iyulunda Rotterdam və Paris Məhkəmələrinə verilib.
Məqalə müəllifi ilə əlaqə ünvanı: [email protected]
