...

Azərbaycanda İT sahəndə artım müşahidə olunur - Microsoft Azerbaijan-ın başçısı ilə müsahibə

Telekommunikasiya Materials 5 May 2009 11:38 (UTC +04:00)
Azərbaycanda İT sahəndə artım müşahidə olunur - Microsoft Azerbaijan-ın başçısı ilə müsahibə

Azərbaycan, Bakı, 04 may / Trend , müxbir S.Babayeva /

Trend -ın Microsoft-un Azərbaycan nümayəndəliyinin başçısı Teymur Axundovla müsahibəsi

- Azərbaycanın İT bazarının hazırkı durumunu necə qiymətləndirirsiniz? MDB məkanındakı hansı telekommunikasiya bazarları sizin fikrinizcə, ən perspektivli sayılır?

- Bu bizim üçün çox vacib məsələdir, çünki biznesimiz bilavasitə İT bazarının inkişafı ilə bağlıdır. Azərbaycanda nələr baş verir? Dünya maliyyə böhranını nəzərə alaraq, durum gözlənildiyindən yaxşıdır. Bizim qiymətləndirmələrə görə, MDB-də informasiya texnologiyaları ən çox dörd ölkədə - Rusiya, Ukrayna, Qazaxıstan və Azərbaycanda inkişaf edib və yeri gəlmişkən, Microsoft məhz bu ardıcıllıqla öz nümayəndəliklərini bu ölkələrdə açıb. İndi görürük ki, adıçəkilən ölkələrdə İT bazarı Azərbaycandakından daha çox zərər görüb. Məsələn, Rusiyada İT məhsula olan tələbat həm əhalidə, həm də korporativ müştərilərdə azalırsa, xoşbəxtlikdən Azərbaycanda biz bunun şahidi olmuruq. Əksinə, İT sahəndə artım müşahidə olunur. Ümid edirəm ki, bu artım gələcəkdə də davam edəcək. Deməzdim ki, böhran Microsoft-un Azərbaycandakı fəaliyyətinə heç təsir etməyib, ancaq bu təsir başqa ölkələrdəkindən azdır.

- Azərbaycanda Regional İnnovasiya Zonasının (RİZ) yaradılmasının hazırlığı gedir. Sizcə, RİZ-in realizəsi ölkəyə nə verəcək və Microsoft bu layihədə özünü hansı rolda görür?

- Biz bu layihəni dəstəkləyirik və dərindən inanırıq ki, o, Azərbaycanda İT sahəsinin inkişafı üçün səmərəli olacaq. Onun ümumi durumuna nəzər yetirsəz, ölkənin İT bazarında nələrin baş verdiyini görməyə imkan verən rəsmin tam olmadığını görərsiz: bununla belə ölkədə həm dövlət, həm özəl müştərilər üçün maraqlı layihələri həyata keçirən güclü şirkətlər mövcuddur. RİZ-in yaradılması bu fəaliyyəti düzənə salmaq, yerli və xarici mütəxəssisləri bir yerə toplamaq imkanı verəcək. Əlbəttə, bu, layihədə iştirak etməkdə maraqlı olan şirkətlərə xüsusi güzəştli şərait yaradılarsa mümkün ola bilər. Bizə gəlincə, biz bu layihədə maraqlıyıq və onu tam dəstəkləyirik.

- Azərbaycan Rabitə və İnformasiya Texnologiyaları Nazirliyinin "Milli kompyuter" layihəsinin realizəsində sizin şirkətinizin rolu nədən ibarətdir?

- Xatırlatmaq istəyirəm ki, "Milli kompyuter" layihəsi Microsoft-un təşəbbüsüdür. Hazırda orta məktəb müəllimlərini əhatə edən pilot layihə gedir və bu addım uğurla nəticələnərsə, başqa sosial qruplara da yayıla bilər. Müəllimlərə komyuterləri güzəştli şərtlərlə əldə etmək imkanı verilir - heç bir faiz olmadan və yetərincə uzun müddətə, əvvəlcədən ödəniş olmadan kredit. Layihə çərçivəsində lisenziyalı PT təqdim edirik və çox vacib faktdır, çünki insanlar bizdə adətən olduğu kimi pirat məhsul deyil, əsl PT əldə edirlər. Bu, istifadəçilərin yeni sinfini formalaşdırır. Onlar lisenziyalı proqram təminatı ilə iş təcrübəsi qazanırlar və bu nöqteyi-nəzərdən layihə bizim üçün vacib əhəmiyyət daşıyır.

- Siz həmçinin "Elektron imza" sisteminin yaradılması üzrə tenderin qalibi olan konsorsiuma da daxilsiniz...

- Bəli, biz PT-nin bütün infrastrukturunun qurulması ilə məşğuluq. Layihə ötən il start götürüb, hazırda onun tammiqyaslı işlənməsi gedir və ilin sonunda başa çatması gözlənilir. Bundan sonra ölkənin elektron-rəqəmsal imza nümunəsinə müraciət edəcək istənilən vətəndaşı və ya təşkilatı sənədləri rəqəmsal şəkildə imzalaya biləcək. Elektron-rəqəmsal imza həm fiziki, həm də hüquqi şəxslər üçün adi imzaya bərabər tutulur. Layihəyə çox tələbat var və mən əminəm ki, onu böyük populyarlıq və uğur gözləyir.

- Azərbaycanda pirat PT-nin səviyyəsini necə qiymətləndirirsiniz?

- IDC şirkətinin qiymətləndirməsinə görə, Azərbaycanda piratçılıq səviyyəsi 92 faizdir. Bu göstəricini aşağı salmaq real və vacibdir, çünki İT sektorunun gələcək inkişafı piratçılıq səviyyəsi ilə birbaşa əlaqədardır. Məsələn, RİZ layihəsində dövlət şirkətləri PT hazırlanması üçün cəlb edəcək, ancaq PT bilavasitə müəllif hüquqları məsələləri ilə birbaşa əlaqəlidir. Nəzərə almaq vacibdir ki, İT-də olan istənilən şirkət bazara çıxmazdan əvvəl piratçılığın səviyyəsini öyrənir. Ölkədəki piratçılığın səviyyəsini göstərən rəqəm sevindirici deyil, baxmayaraq ki, biz birincisi, Əqli Mülkiyyətin Müdafiəsi Agentliyi, Rabitə və İnformasiya Texnologiyaları Nazirliyi kimi dövlət strukturlarının problemin mövcudluğunu anladığını görürük. İkincisi, onların bu problemi aradan qaldırmaq istəyi də görünür.

- Microsoft və Azərbaycan hökuməti arasında strateji müqavilənin nə vaxt imzalanacaq?

- Hazırda bu sənəd üzərində iş gedir: biz onu ilin sonuna qədər imzalamağa ümid edirik. Bunun necə və hansı şərtlər daxilində imzalanacağı hələ dəqiqləşdirilmir. Bir neçə variant var ki, onlar da nəzərdən keçirilir. Əminliklə söyləmək olar ki, həm Microsoft, həm də hökumət bu müqavilənin imzalanmasında maraqlıdırlar.

- Microsoft Vista məhsullarının lokallaşdırılması hansı mərhələdədir? Nə zaman istifadəçilər Vista-nın Azərbaycan versiyasını əldə edə biləcəklər?

- Biz artıq Microsoft Windows XP, Windows Vista və Microsoft Office 2007-ni Azərbaycan dilinə lokallşadırmışıq. İndi isə Microsoft Windows 7  və Microsoft Office 2010-un yeni verisyasını da bu istiqamətdə işləməyə başlayırıq. Qeyd etmək istəyirəm ki, məhsulların lokallaşdırılması hələ onların rəsmi çıxışına qədər aparılır. Yəni azərbaycanlı istifadəçilər artıq lokallaşdırılmış məhsul əldə edəcəklər: bu, Microsoft-un Azərbaycan bazarına marağını göstərir.

Məqalə müəllifi ilə əlaqə ünvanı: [email protected]

Xəbər lenti

Xəbər lenti