...

Azərbaycan biometrik identifikasiya sahəsində Koreyanın təcrübəsindən yararlanacaq

Telekommunikasiya Materials 13 İyun 2011 17:19 (UTC +04:00)

Azərbaycan, Bakı, 13 iyun /Trend, müxbir H.Vəliyev/

Azərbaycan elmi tədqiqatlar sahəsində Koreya Respublikası ilə əməkdaşlığı genişləndirir. Bu barədə bazar ertəsi Trend-ə Azərbaycan Milli Elmlər Akademiyasının İnformasiya Texnologiyaları İnstitutunun struktur bölməsinin rəhbəri Yadigar İmamverdiyev deyib.

İmamverdiyevin sözlərinə görə, institut artıq Koreyanın Elm Fonduna biometrik sistemlərdə informasiyanın birləşdirilməsi üsullarını nəzərdə tutan tədqiqat layihəsini təqdim edib.

"Biometrik üsulları bu gün 5-6 sinif üzrə bölüşdürmək olar. Daha çox yayılanı və geniş tətbiq ediləni biometrik identifikasiyanın sifət cizgiləri və əl barmaq izlərinin konturları üzrə tanınma kimi üsullarıdır. Bizim tədqiqat işimiz əslində multibiometrik sistemlərdə müxtəlif mənbələrdən əldə edilən informasiyanın birləşdirilməsi üçün metodun işlənib hazırlanmasından ibarətdir", - İmamverdiyev qeyd edib.

Bu istiqamətdə iş Koreya mütəxəssisləri ilə birlikdə aparılır və il ərzində Seulun Yonsey Universitetinin biometrik texnologiyalar üzrə elmi mərkəzində davam etdiriləcək.

İTİ-yə artıq Koreya Milli Tədqiqat Fondundan dəvət daxil olub. Bununla əlaqədar sentyabrda bu ölkəyə Yadigar İmamverdiyev və texniki elmlər doktoru Ramiz Şıxəliyev ezam ediləcəklər.

İmamverdiyevin sözlərinə görə, bilavasitə elmi mərkəzlə əməkdaşlığın prioriteti Azərbaycanda bu sahədə aparılan tədqiqatların səviyyəsinin artırılması olacaq. Perspektivdə elmi tədqiqatlara əsaslanan konkret məhsulun istehsalına səylərin yönəldilməsi istisna edilmir.

Xəbər lenti

Xəbər lenti