Azərbaycan, Bakı, 24 oktyabr /Trend, müxbir Hüseyn Vəliyev/
Azərbaycan Milli Elmlər Akademiyasının (AMEA) Respublika Seysmoloji Xidmət Mərkəzi (RSXM) Bakıda tikilən hündür binalarda seysmik monitorinq aparmaq imkanını nəzərdən keçirir. Bunu cümə günü Trend-ə RSXM-in baş direktorunun müavini Azay Rzayev deyib.
Onun sözlərinə görə, RSXM rəhbərliyi ilə Yaponiyanın "SHINYEI OYO S-I" şirkətinin nümayəndələri ilə keçirilən görüşün mövzusu məhz hündürmərtəbəli binalarda seysmik monitorinq aparmaq layihəsi olub.
Tərəflər, həmçinin palçıq vulkanlarının öyrənilməsi sahəsində əməkdaşlığın perspektivlərini müzakirə ediblər.
A.Rzayev qeyd edib ki, sadalanan sahələrdə əməkdaşlıq məsələləri hələ niyyətdir: "Əgər şirkət mövcud sahələrdə konkret işlərin icrası üzrə təkliflə çıxış etsə, biz şübhəsiz ki, onlara baxmağa hazır olacağıq".
