Trans-Asiya-Avropa (TAA) optik magistral kabel xəttinin Xəzər dənizindəki sualtı seqmentinin tikintisi üzrə danışıqların ikinci mərhələsinin keçirilməsi məqsədi ilə Azərbaycan Rabitə və İnformasiya Texnologiyaları Nazirliyinin nümayəndə heyətinin Qazaxıstana səfəri gözlənilir. Trend in Rabitə və İnformasiya Texnologiyaları Nazirliyinin mətbuat xidmətinə istinadən verdiyi xəbərə görə, səfərin dəqiq vaxtı hələ müəyyənləşdirilməyib.
"Əgər tərəflər razılığa gəlsələr, Azərbaycan regionda əsas tranzit dövləti olacaq. Layihənin reallaşması Orta Asiyaya ölkəmizin ərazisindən keçən tranzitlə birbaşa Türkiyə ilə əlaqə saxlamağa imkan verəcək. Eyni zamanda Azərbaycan, Türkiyə, Gürcüstan və başqa ölkələr Qazaxıstan ərazisindən keçməklə, Çinlə əlaqə saxlamaq imkanı əldə edirlər", -deyə nazirlikdən bildiriblər.
TAA Xəzər dənizindəki sualtı seqmentin reallaşması layihəsi (Bakı-Aktau) artıq birinci il deyil ki, Qazaxıstan və Azərbaycan tərəflərinin müzakirə gündəliyində idi və 1999-cu ildə başlanmalı idi. Lakin tərəflərdən birinin qəti razılığı olmadığından tikinti həyata keçirilmədi. Rabitə nazirliyində bilidiriblər ki, Azərbaycan tərəfi hər zaman bu işdə təşəbbüsçü olub və Qazaxıstan tərəfi ilə çoxsaylı rəsmi görüşlərin keçirilməsinə baxmayaraq, bu günə qədər məsələ hələ həll olunmayıb.
Mətbuat xidmətində həmçinin qeyd ediblər ki, hazırda Xəzər dənizin sualtı hissəsindən başqa, Şanxaydan Frankfurta qədər TAA optik lif kabelinin bütün seqmentlərində aparılan tikinti işləri başa çatıb, ona görə də TAA kabeli üzrə informasiya mübadiləsi İran və Rusiya ərazisindəki tranzit vasitəsilə həyata keçirilir, bu da magitsralın təhlükəsizliyini azaldır, ölçüsünü isə artırır.
Hər iki ölkənin dövlət idarələrinin danışıqlarının birinci mərhələsi 2006-cı ilin fevral ayında baş tutub. Bu mərhələdə Qazaxıstan tərəfi bildirib ki, Qazaxıstan kabel çəkilişinin qismən maliyyələşdirilməsi üzrə öhdəlikləri öz üzərinə götürməyə hazırdır. Eyni zamanda Azərbaycan nümayəndə heyətinin nümayəndələri bildiriblər ki, Azərbaycan layihə xərclərinin 50%-ni maliyyələşdirmək üçün lazımi imkana malikdir. Mütəxəssislər bildirirlər ki, ötən dövrlə müqayisədə Qazaxıstan layihəyə daha çox maraq göstərməyə başlayıb və bu son görüşlərdə daha çox nəzərə çarpır. Mümkündür ki, bu Qazaxıstanın telekommunikasiya bazarında yeni operatorların yaranması ilə bağlıdır və bununla əlaqədar layihənin həyata keçirilmə imkanları da genişlənib. "KazaxTelekom" şirkəti ilə yanaşı, Qazaxıstan telekommunikasiya bazarında iş təcrübəsinə malik "KazTransCom" şirkəti də layihə ilə maraqlanmağa başlayıb. Bu şirkətin nümayəndələri ilə görüşdə qeyd olunub ki, "KazTransCom" şirkəti xərclərin 50%-ni maliyyələşdirməyə hazırdır. Öz növbəsind
ə, Qazaxıstanın İnformatizasiya və rabitə Agentliyi və AR Rabitə Nazirliyi ilə təmsil olunan hər iki tərəf ümumi razılığa gəlsələr, Azərbaycan tərəfi bu şirkətlə işləməyə razı olacaq.
Hazırda Azərbaycanda fibro-optik xəttlərin yalnız 10%-dən istifadə olunur.
