Azərbaycan, Bakı / Trend , müxbir S.Babayeva/ Azərbaycan və Özbəkistan informasiya texnologiyaları (İT) sahəsində əməkdaşlığa dair saziş imzalayacaq. Bu barədə "Rabitə Dünyası" qəzetinə müsahibə verən Özbəkistanın Azərbaycandakı fövqəladə və səlahiyyətli səfiri İsmətulla İrqaşev məlumat verib.
Onun sözlərinə görə, Azərbaycanın Rabitə və İnformasiya Texnologiyaları Nazirliyi ilə Özbəkistanın Rabitə və İnformasiya Agentliyi arasında imzalanacaq saziş layihəsi artıq hazırdır və baxılması üçün Azərbaycan tərəfinə təqdim olunub.
Səfir hesab edir ki, sənədin imzalanmasından sonra iki ölkə arasında əməkdaşlığın yeni mərhələsi başlayacaq.
İki ölkənin mütəxəssisləri arasında İT sahəsinin nizama salınması istiqamətində təcrübə mübadiləsi aparmaq, dövlət idarəçilik orqanlarının mükəmməlləşdirilməsi və "Elektron hökumət"in formalaşdırılması üçün informasiya-kommunikasiya texnologiyalarından istifadə, rabitə sahəsində birgə müəssisənin yaradılması, kadrların hazırlanması, seminar, konfrans, forum və sərgilərin keçirilməsi, habelə digər sahələrdə mümkün əməkdaşlığın inkişaf etdirilməsi təmin olunacaq.
