İsrail XİN Türkiyədəki vətəndaşlarını təcili vətənə geri dönməyə çağırıb

İsrailin xarici işlər naziri Aviqdor Liberman Yerusəlimdə keçirilən mətbuat konfransında Türkiyədə yaşayan həmvətənlərinə müraciət edərək, onları təcili olaraq vətənə geri dönməyə çağırıb. Bu barədə Türkiyənin "Cihan" agentliyi məlumat yayıb.

Türkiyə telekanallarının məlumatına görə, minlərlə nümayişçi küçələrə çıxaraq, İsrail HDQ-nin mühasirədə olan Qəzza sektoruna Fələstin əhalisi üçün humanitar yardım aparan beynəlxalq hüquq müdafiəçilərinə qarşı hərəkətlərinə etiraz edir.

CNN Turk telekanalı xəbər verir ki, minlərlə etirazçı İsrailin İstanbuldakı səfirliyini hücumla ələ keçirməyə cəhd göstərir. Lakin türk polisi buna yol verməmək və binanın ələ keçirilməsinin qarşısını almaq məqsədilə təhlükəsizlik tədbirlərini gücləndirib. Bu barədə Türkiyə telekanalları xəbər verir.

İsrail televiziyasına istinad edən türk KİV məlumat verir ki, beynəlxalq donanmaya məxsus gəmilərə hücum nəticəsində 16-dan 18-dək insan həlak olub, 50-dən artıq adam isə yaralanıb.

İsrailin hərbi mənbələri 10 nəfərin həlak olması və 6 İsrail əsgərinin ağır xəsarət aldığını təsdiqləyir.

Türkiyə XİN İsrail hərbçilərinin hərəkətlərini kəskin pisləyərək, onları "qəbuledilməz" adlandırıb və İsrail hökumətindən rəsmi izahat tələb edib. Bu barədə idarənin buraxdığı xüsusi bəyanatda deyilir.

CNN Turk telekanalının məlumatına görə, Türkiyə XİN İsrailin Ankaradakı səfiri Qabi Levini izahat vermək üçün çağırıb.

"Azadlıq donanması"nın tərkibinə altı gəmi daxildir. Onlar mühasirədə olan Qəzzaya, ən azı, 600 hüquq müdafiəçisi və 10 min ton humanitar yük daşıyıblar. İsrail bundan əvvəl də karvanı hədələmişdi. O, gəmiləri yedəyə alaraq, öz limanlarından birinə gətirəcəyini və səfər iştirakçılarını deportasiya edəcəyini açıqlayaraq, Qəzza sektoruna yaxınlaşmağı qadağan etmişdi.