Bakı. Trend:
Rusiya İstehlakçıların Hüquqlarının Müdafiəsi Federal Xidməti ("Rospotrebnadzor") turistlərdən Cənubi Amerika ölkələrinə səfər edərkən "sarı qızdırma" epidemiyası ilə bağlı məlumatları nəzərə almağı xahiş edir.
Bu barədə Trend Federal Xidmətə istinadən məlumat verir.
Ümumdünya Səhiyyə Təşkilatının məlumatına əsasən, 2016-cı ilin yanvarından 2017-ci ilin dekabrınadək Boliviya, Braziliya, Kolumbiya, Peru, Surinam, Fransa Qvianası və Ekvadorda bu epidemiyaya 777 yoluxma halı qeydə alınıb. Onlardan 261-i ölümlə nəticələnib.
Ötən il dekabrın 13-dən Braziliyada bu infeksiyaya yeni yoluxma halları müşahidə olunub. Minas-Jerays ştatında 180 gün fövqəladə vəziyyət elan olunub. Şəhər zooparkı isə meymunların "sarı qızdırma" virusuna yoluxaraq ölməsi səbəbindən bağlanıb.