Bakı. Trend:
ABŞ-ın bir neçə ştatında sakinlər mənşəyi məlum olmayan kimyəvi qoxulu dumandan şikayətlənirlər.
Trend-in Britaniyanın “Daily Mail” qəzetinə istinadən verdiyi məlumata görə, hadisə şahidləri dumanın əsasən Ayova, Viskonsin, Virciniya, Qərbi Virciniya, Kanzas, Merilend, Minnesota, Nebraska, Oklahoma, Şimali Dakota və Florida ştatlarını təsir etdiyini bildirirlər.
Florida sakini dumanla təmasdan sonra hisslərini belə ifadə edib: “Mən isti hiss etdim, qızdırmam olduğunu hiss etdim və mədəm titrəməyə başladı.” Bəzi internet istifadəçiləri baş verənlərin izahı kimi kimyəvi silah istifadəsini irəli sürüblər.
Lakin, Daily Mail-in araşdırması göstərib ki, bu cür duman ilin bu vaxtında tez-tez müşahidə olunur və kimyəvi qoxunun səbəbi, böyük ehtimalla, bölgədə əvvəllər müşahidə olunan hava çirklənməsi ilə əlaqədardır.