Azərbaycan, Bakı, 27 noyabr /Trend, müxbir K.Zərbalıyeva/
Azərbaycanda "Gündəlik Bakı" qəzetinin baş redaktoru ölümlə hədələnib.
Daxili İşlər Nazirliyinin mətbuat xidmətinin şənbə günü yaydığı məlumata görə, noyabrın 26-da saat 12:56-da redaksiyası Yasamal rayonu ərazisindəki Hüseyn Cavid prospekti, 558-ci məhəllədə yerləşən "Gündəlik Bakı" qəzetinin baş redaktoru Habil Vəliyev nazirliyin "102" xidmətinə zəng edərək bu barədə məlumat verib.
O, məlumatda qeyd edib ki, noyabrın 25-də saat 21:20 radələrində redaksiyanın telefonlarına zəng etmiş naməlum şəxslər "redaksiyanı partladacağıq, sizi yox edəcəyik" deyə hədə-qorxu gəliblər. Noyabrın 26-da isə özünü təqdim etməmiş qadın zəng edərək həmin adamın Ağa adlı şəxsin qohumu olduğunu bildirib.
Vəliyev noyabrın 25-də Yasamal rayon Polis İdarəsinin 27-ci polis bölməsinə ərizə ilə müraciət edərək naməlum şəxsin redaksiyaya zəng edərək redaksiyanı partladacağı və onları öldürəcəyi ilə hədələdiyini xəbər verib.