...

Ermənistan konkret cavabdan yayınaraq demaqoqluqla məşğul olur - Azərbaycan XİN

Ermənistan-Azərbaycan münaqişəsi Materials 14 İyul 2011 22:14 (UTC +04:00)
Ermənistanın xarici işlər naziri faktları və ifadələri yenidən təhrif edərək beynəlxalq hüququn bu və ya digər müddəaları haqqında natamam danışmağa çalışır, bu halda isə tamamilə yaddan çıxarır ki, BMT-nin Nizamnaməsinə istinad yalnız müstəmləkələr üçün tətbiq edilir, halbuki Dağlıq Qarabağ heç vaxt müstəmləkə statusuna malik olmayıb. Bu barədə Trend-ə Azərbaycan XİN-in rəsmi nümayəndəsi Elxan Poluxov bildirib
Ermənistan konkret cavabdan yayınaraq demaqoqluqla məşğul olur - Azərbaycan XİN

Trend-i buradan izləyin

Azərbaycan, Bakı, 14 iyul /Trend, müxbir S.Ağayeva/

Ermənistanın xarici işlər naziri faktları və ifadələri yenidən təhrif edərək beynəlxalq hüququn bu və ya digər müddəaları haqqında natamam danışmağa çalışır, bu halda isə tamamilə yaddan çıxarır ki, BMT-nin Nizamnaməsinə istinad yalnız müstəmləkələr üçün tətbiq edilir, halbuki Dağlıq Qarabağ heç vaxt müstəmləkə statusuna malik olmayıb. Bu barədə Trend-ə Azərbaycan XİN-in rəsmi nümayəndəsi Elxan Poluxov bildirib.

"Təəsüf ki, demək lazım gəlir ki, Azərbaycanın həm Dağlıq Qarabağ münaqişəsinin nizamlanması, həm də ATƏT-in Minsk qrupunun həmsədrlərinin bu münaqişənin həlli üçün formulun tapılmasına görə səyləri ilə bağlı aydın və dəqiq mövqeyinə cavab olaraq, Ermənsitan boş demaqoqluqla ilə məşğul olur və konkret suallara konkret cavab verməkdən yayınır", - Poluxov Ermənistanın xarici işlər naziri Edvard Nalbandyanın son bəyanatını şərh edən zaman deyib.

Onun sözlərinə görə, Ermənistan XİN rəhbəri bəyan edirsə ki, onun ölkəsi həmsədrlərin təkliflərini qəbul edir, bu, yeniləşmiş Madrid prinsiplərində yer alan dəqiq ifadə olunmuş təkliflərin qəbul edilməsini nəzərdə tutur.

Poluxovun sözlərinə görə, sadə məntiqlə bu o deməkdir ki, növbəti addım sülhün əldə olunmasına səbəb olacaq hüquqi öhdəlik verən sülh müqaviləsi üzərində iş olmalıdır. Lakin biz buna məhz Yerevanda hazır olmadıqlarını görürük.

"Dağlıq Qarabağın beynəlxalq səviyyədə tanınan aralıq statusu" kimi absurd ideyaya gəldikdə, beynəlxalq ictimaiyyət Ermənistan XİN rəhbəri kimi sözlərlə hoqqabazlıq etməyərək yalnız son formalaşdırılan və qəbul edilən statusu qəbul edir və tanıyır", - o bildirib.

"Dağlıq Qarabağın alacağı aralıq statusu belə, Azərbaycanın razılığı olmadan təsdiq edilə bilməz, bu isə o deməkdir ki, Dağlıq Qarabağ Azərbaycanın tərkib hissəsi olub, tərkib hissəsidir və olacaq", - Poluxov bildirib.

"Mən Nalbandyana öz auditoriyasını sakitləşdirmək üçün digər vədlər axtarmağı məsləhət görürəm. Belə ki, öz vətəndaşlarını aldadaraq, o və bütün Ermənistan hakimiyyəti öz ölkəsinin gələcəyi ilə oynayırlar", - Poluxov bildirib.

Poluxov Ermənsitan XİN rəhbərinə onu da məsləhət görüb ki, suveren dövlətin ərazi bütövlüyünə zərər vuraraq öz müqəddəratını təyinetmə hüququnun tətbiqinin yolverilməzliyini dəqiq izah edən Helsinki Yekun Aktını öz stolüstü kitabı etsin və bəyanat verməzdən əvvəl hər dəfə onu təkrar oxusun.

Cümə axşamı Nalbandyan bildirib ki, Azərbaycan tərəfinin əsas prinsiplər razılaşdırılmadan Dağlıq Qarabağ üzrə sülh sazişinin dərhal imzalanmasına başlamaq barədə çağırışı bütün danışıqlar prosesini pozmaq deməkdir.

Dünən Azərbaycanın xarici işlər naziri Elmar Məmmədyarov Ermənistanı Dağlıq Qarabağ münaqişəsinin dinc yolla həllini əks etdirən sənədi yubatmadan təsdiq etməyə çağırıb.

İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.

BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.

Xəbər lenti

Xəbər lenti