Azərbaycan, Bakı, 6 yanvar / Trend müxbir M.Əliyev/
Azərbaycan-Belçika parlamentlərarası əlaqələr üzrə işçi qrupu Xocalı faciəsi məsələsinin Belçika parlamentində qaldırılması üzrə iş aparır. Trend-in məlumatına görə, bu barədə jurnalistlərə işçi qrupunun rəhbəri, millət vəkili Elxan Süleymanov bildirib.
Onun sözlərinə görə, bu 2012-ci il üçün işçi qrupunun müəyyənləşdirdiyi plana əsasən həyata keçiriləcək.
Həmçinin plana Azərbaycan haqqında məlumatların Belçika televiziyasında yayılması, Azərbaycan və Belçika universitetləri arasında tələbə mübadiləsinin aparılması, Belçikanın Thun və Azərbycanın Şamaxı şəhərlərlərinin qardaşlaşması və bununla bağlı Thun şəhərində Mirzə Ələkbər Sabirin heykəlinin ucaldılması məsələləri daxildir.
Cümə günü Milli Məclisdə Azərbaycan-Belçika parlamentlərarası əlaqələr üzrə işçi qrupunun rəhbəri Filip Blanşarın başçılıq etdiyi nümayəndə heyəti ilə görüş keçirilib.
Milli Məclis sədrinin birinci müavini Ziyafət Əsgərov görüşdə Dağlıq Qarabağ münaqişəsi ilə bağlı məlumat verərək bildirib ki, 20 ilə yaxındır Azərbaycan ərazilərinin 20 faizə yaxını işğal altındadır. Əsgərov Ermənistanın Azərbaycan ərazilərində etnik təmizləmə apardığını vurğulayıb.
Birinci vitse-spiker Azərbaycanın işğal olunmuş əraziləri ilə bağlı dörd qətnamənin qəbul olunduğunu, lakin bunların heç birinin yerinə yetirilmədiyini qeyd edib. O bildirib ki, Belçika parlamenti Dağlıq Qarabağ münaqişəsinin ədalətli həlli məsələsini öz iclaslarında qaldırsa, Avropanın ikili standartlardan uzaqlaşdığını deyə bilərik.
Görüşdə Filip Blanşarla Dağlıq Qarabağ münaqişəsi, həmçinin Azərbaycan-Belçika münasibətləri barədə fikir mübadiləsi aparılıb.
Görüşdən sonra keçirilən brifinqdə Blanşar görüşün əhəmiyyətindən danışıb. O, yanvarın 7-də Azərbaycanın əyalətlərinə səfər edəcəyini, məcburi köçkünlərlə və onların problemləri ilə məşğul olan qurumların nümayəndələri ilə görüşəcəyini bildirib. Blanşar qeyd edib ki, səfərin əsas məqsədi Dağlıq Qarabağ münaqişəsinin müzakirəsidir.
1992-ci il fevral ayının 25-26-da erməni silahlı birləşmələri Xankəndində yerləşən Rusiyaya məxsus 366-cı alayın köməyi ilə azərbaycanlılar yaşayan Xocalı şəhərinə hücum edərək dinc əhaliyə qarşı xüsusi qəddarlıqla müşayiət olunan soyqırım aktını həyata keçiriblər. Bu faciə nəticəsində 613 dinc sakin qətlə yetirilib, 487 nəfər yaralanıb, 1275 nəfər isə əsir götürülüb. Onlardan bir çoxu əsirlikdən qayıtmayıb və sonrakı taleyi barədə hər hansı məlumat yoxdur. 366-cı alay Xankəndindən çıxarıldıqdan sonra bu hərbi hissəyə məxsus silahlı texnikanın mühüm hissəsi erməni separatçılarına verilib.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
