Azərbaycan, Naxçıvan / Trend müxbir E.Məmmədov/ Şimali Kipr Türk Respublikasının prezidenti Məhmət Əli Tələtin gələn il Naxçıvana səfəri planlaşdırılıb. Trend in bölgə müxbirinin məlumatına görə, bununla bağlı Naxçıvan Muxtar Respublikası Ali Məclisinin sədri Vasif Talıbovun Şimali Kiprə səfəri zamanı razılıq əldə olunub.
Şimali Kipr Türk Respublikasının (ŞKTR) yaranmasının 24-cü ildönümü münasibətilə adaya səfər edən Talıbov prezident Tələtlə və parlamentin sədri xanım Fatma Ekenoğlu ilə görüşüb. Tələt noyabrın 17-də Bakıda keçirilən Türk Dövlət və Cəmiyyətləri 11-ci Dostluq, Qardaşlıq və Əməkdaşlıq Qurultayında iştirak etmək üçün Azərbaycana səfər edib,
Görüş zamanı Naxçıvan MR-lə ŞKTR arasında əməkdaşlığın perspektivləri müzakirə olunub.
Naxçıvan MR-in ərazisi 5,5 min kvadrat kilometrdir. Ölkə ərazisinin 6,4%-ni təşkil edir. 7 inzibati rayona (Babək, Şərur, Ordubad, Sədərək, Şahbuz, Culfa və Kəngərli ) bölünüb. Əhalisi 380,2 min nəfər, paytaxtı Naxçıvan şəhəridir.
