Azərbaycan, Bakı, 30 yanvar / Trend , müxbir S.Əliyev / "Şahdəniz" layihəsinin texniki operatoru olan "BP Azerbaijan" şirkəti yataqda istismarda olan quyuların birində qaz hasilatını dayandırıb. Bu barədə hökumətdən məlumat verilib. Hazırda yataqda qaz hasilatının gündəlik debiti təxminən 16 mln. kubmetrə bərabərdir. Quyunun istismarını dayandırmazdan əvvəl isə 21 mln. kubmetr olub.
"Quyu araşdırmalar aparılması üçün dayandırılıb" - hökumətdən bildirilib.
Ötən il dekabrın sonunda istismara verilən sonuncu quyuda hasilat dayanıb və həftənin sonunadək bərpa ediləcək. 16 mln. kubmetrdən artıq olan istismar həcminin təxminən 15 mln. kubmetri Türkiyəyə, 1 mln. kubmetri Gürcüstana ixrac olunur və kiçik həcmi Azərbaycana verilir.
Yataqda cəmi dörd quyu istismar edilir (dayandırılan daxil olmaqla). Hazırda beşinci quyunun qazıntı işləri aparılır və bu ilin ortalarında yekunlaşması nəzərdə tutulub.
"Şahdəniz" dəniz yatağının işlənməsi üzrə müqavilə 1996-cı ilin iyunun 4-də imzalanıb. Müqavilənin iştirakçıları: BP (operator) -25,5 faiz, Statoil - 25,5 faiz, NICO - 10 faiz, Total - 10 faiz, LukAgip - 10 faiz, TPAO- 9 faiz, ADNŞ - 10 faiz.
Bu yataqda qaz hasilatı 2006-cı ilin dekabrında başlayıb. Hazırda qaz Cənubi Qafqaz qaz borusu ilə Gürcüstana və Türkiyəyə nəql olunur. Azərbaycan da qazın alıcılarındandır.
Yatağın istismarının birinci mərhələsi çərçivəsində hər il 8,8 mln. kubmetr qaz hasil edilməsi nəzərdə tutulub. Bu həcm Azərbaycana, Gürcüstana və Türkiyəyə satılacaq. 2012-ci ildən sonra başlayacaq ikinci mərhələ çərçivəsində qaz hasilatı 20 mlrd. kubmetrə çatdırılacaq. Bu mərhələ çərçivəsində qazın Avropa ölkələrinə nəql edilməsi güman edilir.
