Azərbaycan, Bakı, 1 fevral / Trend , müxbir İ.Əlizadə/ Parlamentdəki Müsavat deputat qrupu Azərbaycan Demokratik Respublikasının (ADR) yaradılmasının 90 illiyinin dövlət səviyyəsində qeyd olunması ilə bağlı təkliflər hazırlayıb. "Dağüstü parkda ADR-ə həsr olunmuş abidə ucaldılmalıdır" - deyə Milli Məclisin cümə günü keçirilən iclasında Musavat deputat qrupunun üzvü Arzu Səmədbəyli bildirib.
O qeyd edib ki, Bakı və Gəncə şəhərlərində ADR-in yaradıcısı Məmməd Əmin Rəsulzadəyə heykəl qoyulmalıdır və Bakı Dövlət Universitetinə M.Ə. Rəsulzadənin adı verilməlidir. Eyni zamanda, Azərbaycanın rayon və şəhərlərində ADR-in yaradıcılarının adına küçələr verilməli, onların ev muzeyləri yaradılmalıdır: "Bundan başqa, Dövlət Konservatoriyasına Uzeyir Hacıbəyovun Adı qaytarılmalıdır".
Milli Məclis sədri Oqtay Əsədov isə bildirib ki, təklifləri Parlamentin sessiyası başlamamışdan əvvəl komissiyalara təqdim etmək lazım idi.