Azərbaycan, Bakı, 08 fevral / Trend , müxbir Q.Cəbiyev/ Azərbaycanın müxalif Cəmiyyət Partiyası prezident seçkisində hər hansı müxalifət namizədini dəstəkləmək niyyətində deyil. "Partiyanın lideri Rəsul Quliyevin seçkilərə qədər Azərbaycana qayıdışı baş tutumasa, ACP alternativ variant kimi başqa müxalifət namizədini dəstəkləməyi düşünmür" cümə günü Trend ə partiyanın Ali Məclisinin sədri Yaqub Abbasov bildirib.
Eks-spiker, ABŞ-da mühacir həyatı yaşayan Quliyevin Azərbaycana qayıdışı üçün partiya tərəfindən proqram hazırlanıb. Proqram yaxın vaxtlarda tanış olmaq üçün Quliyevə göndəriləcək. Ölkədə prezident seçkisi oktyabrda keçiriləcək.
Abbasov deyib ki, partiya Azərbaycanda qarşılıqlı etimad mühitinin yaranmasının və siyasi barışığın tərəfdarıdır. Onun sözlərinə görə, namizədliyə iddialı olan müxalifət liderləri siyasi reytinq baxımından iqtidarın namizədi olan İlham Əliyevdən geri qalırlar. Abbasov müxalifətdən olan namizədləri dəstəkləməyəcəklərinin səbəblərini də açıqlayıb: "İndiyə qədər həmişə müxalifət namizədlərini müdafiə etmişik. Sonda onların heç biri ciddi nəticə əldə etməyib. Bu gün yanaşma, baxışlar dəyişib. Ənənəvi texnologiya özünü doğrultmur, müxalifət isə mövcud reallıqlara uyğun addım ata bilmir"
Sağ mərkəzçi, müxalifətyönlü ACP ötən ilin aprelində təsis olunub. Partiyanın lideri Azərbaycanın eks-spikeri, hazırda mühacirətdə yaşayan Rəsul Quliyevdir. Bu ilin fevralınadək ADP-nin sədri olmuş Quliyev və onun tərəfdarları etiraz olaraq ADP-dən imtina edərək özlərinin Açıq Cəmiyyət Partiyasını yaradıblar.
