Azərbaycan, Bakı, 22 fevral / Trend , müxbir Q.Cəbiyev/ Müxalif Azərbaycan Demokrat Partiyası (ADP) prezidentliyə namizədinin seçki kampaniyasını qurmaq üçün maliyyə vəsaiti toplamağa başlayıb. Bu barədə cümə günü Trend -a ADP sədri Sərdar Cəlaloğlu məlumat verib.
ADP Ali Şurası fevralın 16-da Cəlaloğlunun prezidentliyə namizədliyini irəli sürüb. Ekspertlərin fikrincə, Azərbaycanda ideal seçki kampaniyası keçirmək üçün 1 milyon dollar vəsait lazımdır.
Cəlaloğlu bildirib ki, kifayət qədər könüllülərdən, təşəbbüskar insanlardan istifadə edərək daha çevik və operativ seçki kampaniyası aparmaqla az vəsait sərf etmək mümkündür. "Bizim hesablamalara görə, 500 min manat seçki kampaniyası aparmaq üçün kifayət edəcək. Biz daha çox qənaət etməklə təbliğat kampaniyası aparmağı fikirləşirik" ADP-nin prezidentliyə namizədi əlavə edib.
Onun sözlərinə görə, seçki kampaniyasını maliyyələşdirmək üçün partiyanın daxilində və partiyadan imkanları şəxslər var.
Azərbaycanda prezident seçkiləri oktyabrda keçiriləcək. Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya ötən ilin yanvarınadək iqtidara qarşı radikal müxalif mövqedə olub. Yanvarda ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını yaradıblar.
