Azərbaycan, Bakı, 28 fevral / Trend , müxbir S.Ağayeva/ Azərbaycanda müvəqqəti yaşayan Rusiya vətəndaşları Rusiyada keçirilən prezident seçkiləri zamanı Bakıda və Qəbələdə səs verə biləcəklər.
Rusiyada mart ayının 2-də prezident seçkiləri keçiriləcək. Rusiya Federasiyası prezidentinin seçkilər barədə Federal qanununa müvafiq olaraq, xaricdə yaşayan Rusiya vətəndaşları arasında demokratik seçkilərin keçirilməsini Xarici İşlər Nazirliyi təşkil edir.
Rusiyanın Azərbaycandakı səfirliyindən cümə axşamı verilən məlumat görə, Azərbaycan ərazisində iki seçki məntəqəsi - Bakıda Bakıxanov küçəsi 17-də yerləşən Rusiya səfirliyində və Rusiya tərəfindən Azərbaycanda icarəyə götürülən Radiolokasiya Stansiyasında (RLS) müvvəqqəti olaraq işləyən Rusiya vətəndaşlarının yaşadığı Qəbələ rayonunda yaradılıb.
Rusiya qanunvericiliyinə müvafiq olaraq, seçkilər günü səsvermə yerli vaxtla saat 08.00-dan 20.00-dək keçiriləcək.
Rusiyanın namizədlər siyahısında qeydiyyatdan keçmiş siyasi partiyalar səsvermə prosesini müşahidə etmək üçün xaricdə olan rusiyalılar arasından öz müşahidəçilərini rəsmən təyin edə bilərlər.
