Azərbaycan, Bakı, 03 mart / Trend , müxbir S.İlhamqızı/ Azərbaycan Naminə İctimai Forumun rəhbəri Eldar Namazovun Azərbaycanın eks-spikeri Rəsul Quliyevlə görüşündə prezident seçkisində vahid namizədlə iştirak barədə razılığa gəlinə bilər. Bu barədə Trend ə Quliyevin liderlik etdiyi Açıq Cəmiyyət Partiyasının sədr müavini Yaqub Abbasov açıqlama verib.
Azərbaycan Prezidenti Katibliyinin keçmiş rəhbəri, hazırda müxalifətdə təmsil olunan Namazovun bu ilin oktyabrında keçiriləcək prezident seçkisində namizədliyini irəli sürəcəyi gözlənilir. Müxalifətçi Açıq Cəmiyyət Partiyasının da prezidentliyə namizədi partiyanın lideri Quliyevdir.
Namazov bu günlərdə ABŞ-a səfər edəcək və Quliyevlə görüş keçirəcək, builki prezident seçkisində müxalifətin iştirakı məsələləri barədə onunla müzakirələr aparacaq.
Abbasovun sözlərinə görə, bu iki müxalifət liderinin birgə qərar qəbul etməsi və prezident seçkisində birinin digərini dəstəkləməsi mümkündür. Abbasov eyni zamanda hesab edir ki, builki prezident seçkisində Quliyev heç bir namizədə güzəştə getməyəcək: "Biz Rəsul Quliyevi ən şanslı namizəd hesab edirik. Bütün namizədlər arasında Rəsul Quliyev indiki hakimiyyətə daha yaxşı bələddir"-deyə Abbasov bildirib.
Sağ mərkəzçi, müxalifətyönlü ACP 2007-ci ilin aprelində təsis olunub. Partiyanın lideri, Azərbaycanın eks-spikeri Quliyev 1996-cı ildən indiyədək ABŞ-da mühacirətdə yaşayır.