Azərbaycan, Bakı, 12 mart/ Trend , müxbir İ.Əlizadə/Azərbaycan Parlamentində müxalifəti təmsil edən Müsavat deputat qrupunun üzvləri yaxın vaxtlarda Gürcüstanda yaşayan azərbaycanlıların sıx məskunlaşdıqları Borçalı (Kvemo-Kartle) bölgəsinə səfər edəcəklər. "Səfərdə məqsəd Gürcüstanda yaşayan azərbaycanlıların problemlərini öyrənmək və onların həll olunması üçün Gürcüstan rəsmiləri ilə müzakirələr aparmaqdır" -deyə çərşənbə günü Trend a açıqlamasında Müsavat deputat qrupunun üzvü Pənah Hüseyn bildirib.
Müsavat deputat qrupunun üzvləri 2007-ci ildə Gürcüstana səfər ediblər.
Hüseyn hesab edir ki, bu cür səfərlərin müsbət nəticəsi var.
"Borçalıya səfər edib problemlərlə bağlı məsələ qaldırmağımız artıq öz bəhrəsini verməkdədir. Məktəb direktorlarının seçim məsələsində gürcü dilini mükəmməl bilməsi məsələsinin bir şərt olması ilə bağlı hökumət qərarı var idi. Biz bu məsələnin Borçalıda müəyyən problemlər yaratdığı barədə məsələ qaldırdıq. Apardığımız danışıqlardan sonra hökumət həmin qərarı ləğv etdi. Bir sıra sosial problemlər var idi ki, tədricən yoluna qoyulmağa başlanılıb" - deyə deputat əlavə edib.
Onun sözlərinə görə, səfərin vaxtı dəqiqləşdirilir.
Müsavat deputat qrupunun beş üzvü var.
