Azərbaycan, Bakı, 23 aprel / Trend , müxbir S.İlhamqızı/ Dünya Azərbaycanlıları Konqresinin sədri Sabir Rüstəmxanlı İlhamə Quliyevanı DAK-a ləkə yaxmaqda günahlandırır.
"İlhamə xanım bilir ki, DAK könüllü bir təşkilatdır, heç kimə pul qazandırmır, vəzifə və şöhrət vermir. Bunu bilə-bilə DAK-a ləkə yaxmaq ziyalıya yaraşmayan hərəkətdir"-deyə Rüstəmxanlı çərşənbə günü Trend a açıqlamasında bildirib.
DAK növbəti dəfə iki yerə paçalanıb, qurumun İdarə Heyəti sədr Qulamrza Səbri Təbrizini vəzifəsindən uzaqlaşdırmaq barədə qərar çıxarıb və Rüstəmxanlını Konqresin sədri seçib. Təbrizi isə bunu qeyri-qanuni sayır və özünün DAK sədri olduğunu iddia edir. Rüstəmxanlının tərəfdarları mayın 24-25-də Almaniyanın Köln şəhərində, Təbrizinin tərəfdarları isə iyunun 22-23-də Brüsseldə DAK-ın qurultayını keçirməyə hazırlaşırlar.
DAK-ın Mədəniyyət Akademiyasının prezidenti, Xalq artisti İlhamə Quliyeva ötən gün keçirdiyi mətbuat konfransında həm Təbrizini, həm də Rüstəmxanlını ittiham edib, onların hər ikisinin qeyri-legitim yolla sədr seçildiyini deyib. Quliyeva həmçinin iddia edib ki, DAK daxilində bəzi şəxslər bölgələrdə tədbirlər keçirib DAK adından özləri üçün pul yığır, əsasən icra başçılarından pul alırlar.
Rüstəmxanlı bu iddianı təkzib edib və bildirib ki, DAK üzvləri hər zaman öz şəxsi vəsaitləri ilə təşkilatın qurultaylarına qatılıblar, təşkilatdakı fəaliyyətlərinə görə qazanc güdməyiblər.
"Bir çox DAK üzvləri var ki, hər zaman öz ailələrinin boğazından kəsib DAK-ın xarici ölkələrdə keçirilən qurultaylarına, tədbirlərinə qatılıblar, uzun illərdir DAK-ın yolunda canlarını fəda edirlər. Bunu bilə-bilə təşkilat üzvlərini ləkələmək alçaqlıqdır"-deyə Rüstəmxanlıbildirib.
O, əlavə edib ki, xanım Quliyeva İdarə Heyətinin son toplantısından, orada baş verənlərdən xəbərsiz olduğu üçün Rüstəmxanlının qeyri-legitim seçildiyini iddia edə bilməz: "Mən İlhamə xanımın əvəzinə onun repertuarı haqqında danışa bilmərəm, o da məlumatsız olduğu işlər barədə qeyri-dəqiq şərhlər verməməlidir. Mənim sədr seçilməyim barədə İdarə Heyətinin qərarı olan sənəd Avropanın bütün ölkələrindəki DAK üzvlərinə göndərilib"-deyə Rüstəmxanlı bildirib.
O, həmçinin deyib ki, İnternet saytlarda, qəzetlərdə müxtəlif anonim imzalarla DAK haqqında yazılar yazılır və bunu yazan şəxslərin təşkilatdan, onun idarəçiliyindən xəbərləri belə yoxdur.
Rüstəmxanlı onu da deyib ki, mayın 24-25-də keçiriləcək qurultayda DAK-ın sədrliyinə iddialı olmayacaq və şəxsən özü Güney Azərbaycanı təmsil edən namizədə səs verəcək.
Müəlliflə əlaqə saxlamaq üçün elektron ünvan - [email protected]
