Bakı. Trend:
ABŞ-nin sabiq prezidenti Co Bayden prezidentliyi dövrünə həsr olunmuş ""Mənə söz ver, Amerika" ("Promise Me, America") adlı kitabının noyabrın 17-də nəşr olunacağını açıqlayıb.
83 yaşlı sabiq dövlət başçısı iyulun 15-də sosial şəbəkə hesablarında paylaşdığı videoda bildirib ki, kitabda Ağ Evdə keçirdiyi dörd il, ölkənin üzləşdiyi çətinliklər, qəbul etdiyi qərarlar və bu qərarların səbəbləri ətraflı şəkildə əks olunacaq.
"Son vaxtlar ailəmlə çox vaxt keçirirəm. Xərçəng xəstəliyinə görə müalicə alıram və hər şey həqiqətən çox yaxşı gedir", - deyə Bayden qısa videoda bildirib.
Sabiq prezident qeyd edib ki, kitabında ABŞ-nin bir xalq kimi qarşılaşdığı çağırışlardan, prezident kimi qəbul etdiyi qərarlardan və onları qəbul etmə səbəblərindən bəhs ediləcək.
ABŞ-ın 46-cı prezidenti kitabında, həmçinin 2024-cü il iyulun 21-də ikinci prezidentlik müddəti uğrunda mübarizədən niyə imtina etdiyini və namizədliyi vitse-prezidenti Kamala Harrisin xeyrinə geri götürməsinin səbəblərini də izah edəcəyini bildirib.
"Mənə söz ver, Amerika" kitabının noyabrın 17-də, ABŞ-da aralıq seçkilərindən bir neçə həftə sonra satışa çıxarılması planlaşdırılır.
