Azərbaycan, Bakı, 16 may / Trend müxbir E. Babayev/ Azərbaycanın əsas müxalifət partiyaları hesab edir ki, Seçki Məcəlləsinə dəyişikliyin edilməsi ilə bağlı vahid mövqe ümumilikdə müxalifətin birləşmsinə təkan verə bilməz.
"Seçki Məcəlləsinə dəyişikliklərlə bağlı müxalifət vahid mövqe bildirsə də, bu strateji əməkdaşlığa qədər gedib çıxmayaçaq", deyə cümə günü Trend ə Azərbaycan Demokrat Partiyasının (ADP) prezidentliyə namizədi, təşkilatın sədri Sərdar Cəlaloğlu deyib.
Azərbaycanda payızda keçiriləcək prezident seçkisi ərəfəsində hökumət və Venesiya komissiyası arasında mövcud Məcəlləyə əlavə və dəyişiklərin edilməsi ilə bağlı parlamentin müzakirəsinə iki qanun layihəsi təqdim edilib. Layihələr Azərbaycan prezidenti administrasiyası və parlamentin komissiyası tərəfindən hazırlanıb. Müxalifətin təqdim etdiyi layihələri isə parlament müzakirə etməyib.
Seçki Məcəlləsinə təklif edilən əlavə və dəyişikliklər sırasında dövlət KİV-də pulsuz seçki təbliğatının aparılmasının, yaşayış binalarına təbliğat mateliallarının yapışdırılmasının qadağan olunması kimi məsələlər müxalifətin narazılığına səbəb olub və bu istiqamətdə vahid mövqe sərgilənir.
"Tutaq ki, biz vahid namizəd müəyyən etdik. Seçki Məcəlləsinə ediləcək dəyişikliyə görə, hətta sadə inzibati pozuntuya görə namizədlik ləğv oluna bilər. Əgər vahid namizəd olsa və onun bu şəkildə namizədliyi ləğv olunsa, müxalifət seçkidən kənarda qala bilər. İndiyə qədər olub ki, müxalifət dəfələrlə birləşib. Bu birlik birləşməməklə demək olar ki, eyni nəticələrə gətirib çıxırıb"- deyə o vurğulayıb.
Müxalif Müsavat Partiyasının Mərkəzi İcra Aparatının rəhbəri Arif Hacılı da cümə günü Trend ə bildirib ki, Azərbaycan müxalifətinin Seçki Məcəlləsi ilə bağlı tutduğu mövqe vahid komandaya çevrilməyə və vahid namizədlə seçkiyə getməyə qədər gedib çıxmayacaq. "Müxalifətin seçkilərdə iştirakla bağlı mövqeyi eyni deyil. Bir qism partiyalar seçkini boykot etmək istəyir. Mənim fikrimcə, müxalifətin birliyi ölkədə demokratik islahatlar aparılması çərçivəsində baş tuta bilər və bu, seçkidə vahid namizədlə iştiraka qədər inkişaf etməyəcək"- deyə o bildirib.
Üç müxaliət partiyasını (Xalq Cəbhəsi, Vətəndaş və İnkişaf, Liberal) özündə birləşdirən "Azadlıq" bloku da hesab edir ki, müxalifətin Seçki Məcəlləsi ilə bağlı vahid mövqeyi seçkiyə bir namizədlə getməyə qədər inkişaf etməyəcək. Vətəndaş və İnkişaf Partiyasının sədri Əli Əliyev cümə günü Trend ə bildirib ki, hələlik müxalifətin demokratik islahatlarla bağlı vahid mövqe sərgiləməsi daha inandırıcı görünür. "Proseslərin hansı məcraya qədər gedib çıxacağı isə gedişatdan asılıdır. Ancaq vahid namizəd məsələsinin reallaşacağı hələlik inandırıcı təsir bağışlamır" - deyə o əlavə edib.
Məqalə müəllifi ilə əlaqə saxlamaq üçün ünvan - [email protected]