Azərbaycan, Bakı, 26 may/ Trend , müxbir E.Babayev/ Azərbaycanın Mətbuat Şurası kütləvi informasiya vasitələrində (KİV) çalışan jurnalistlərin sosial problemlərinin həlli üçün Təkliflər Zərfi hazırlayır. "22 iyul Milli Mətbuat Gününə qədər bu məsələni gündəmə gətirib, problemin həlli istiqamətində irəliləyişə nail olunmasına çalışacağıq", bazar ertəsi Trend -a Mətbuat Şurasının sədri Əflatun Amaşov bildirib.
Trend -un arayışı: Ötən həftə Azərbaycanın "Lider" telekanalı rəhbərliyinin əməkdaşlarına mənzillər verdiyi müəyyənləşib. "Azad Azərbaycan" telekanalı rəhbərliyi isə əməkdaşlarına mənzil paylayacağını açıqlayıb. Bu addım yazılı KİV-lərin mənzil problemini gündəmə gətirib.
Azərbaycanda 2000-dən artıq qəzet və jurnal qeydiyyata alınıb. Onlardan 30-dan artığı gündəlik qəzetdir.
Amaşov bildirib ki, həmin televiziyaların əməkdaşlarına mənzil paylaması sevindiricidir. "Yazılı KİV-lərin isə sosial vəziyyəti ürəkaçan deyil və qəzetlər öz əməkdaşlarına mənzil vermək imkanından çox-çox uzaqdır" deyən Amaşovun sözlərinə görə, bir çox ölkələrdə jurnalist işə götürülərkən onunla müqavilə imzalanır və bu müqavilədə jurnalistlərin mənzillə təminatı məsələsi də yer alır. Yəni jurnalistin evlə təmini üçün mümkün addımlar həmin KİV tərəfindən həyata keçirilir. "Azərbaycanda jurnalistlərin sosial durumu bizi narahat edən ən ümdə məsələlərdəndir. Bununla bağlı müvafiq konsepsiya Prezidentin İcra Aparatına göndərilib" deyən Amaşov qeyd edib ki, jurnalistlərin mənzil probleminin həlli üçün ən optimal yollardan biri jurnalistlər üçün ayrıca şəhərciyin salınmasıdır. Onlara bu şəhərcikdə mənzillə təmin olunmaları üçün güzəştli kreditlər verilə bilər.
Onun sözlərinə görə, bu istiqamətdə bir il bundan öncə Bakı Şəhər İcra Hakimiyyəti ilə birgə iş aparılıb. "Həmin vaxt jurnalistlərin müraciətinə cavab olaraq bir neçə yer təklif olundu. O yerlərin əksəriyyəti yarımçıq tikililər idi və orada qaçqınlar yaşayırdı. Əxlaqi baxımdan onların həmin yerlərdən çıxarılması və orada jurnalistlər üçün ev tikilməsi düzgün olmazdı" deyən Amaşov vurğulayıb ki, Milli Mətbuat Gününə qədər jurnalistlərin mənzil probleminin həlli üçün mümkün variantlar yenidən işə salınacaq.
Məqalə müəllifi ilə əlaqə ünvanı: [email protected]
