Azərbaycan, Bakı, 18 iyun/ Trend , müxbir E.Babayev/ Azərbaycanın siyasi Müasir Müsavat Partiyası (MMP) seçkidə qələbə qazanacağına inanır. "Hesab edirəm ki, qarşıdan gələn prezident seçkisində əsas rəqabət hakimiyyətin namizədi ilə mənim aramda gedəcək" - cümə axşamı Trend -a MMP sədri Hafiz Hacıyev deyib.
Trend -un arayışı: Azərbaycanda prezident seçkisi oktyabrın 15-də keçiriləcək. Bu gün MMP-nin 3-cu qurultayında Hacıyevin prezidentliyə namizədliyi irəli sürülb. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürmək niyyətindədir. İqtiadaryönlü Ana Vətən və Sosial Rifah partiyaları da seçkidə İlham Əliyevin namiəzdliyini müdafiə etmək qərarı veriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə, seçkiləri boykot edəcəyi barədə bəyanat verib.
Hacıyev iddia edib ki, bu gün MMP ilə hakim Yeni Azərbaycan Partiyasından başqa heç kim mübarizə apara bilməz. " Hakim partiya seçkidə qələbə qazansa, biz onların əlini sıxmağa hazırıq. Biz ya bir, ya da ikinci yeri tutacağıq. Əsl müxalifət bizik. Digər özlərini müxalifət adlandıran partiyalara gəldikdə isə, onların bəziləri qorxudan seçkiyə getmir. Seçkiyə qoşulmaq istəyən İsa Qəmbəri isə, mən 2003-cü il prezident seçkisində neytrallaşdrımşıam. O seçkiyə qoşulsa, yenə öz cavabını alacaq" - deyə Hacıyev bildirib.
Hafiz Hacıyev 1992-93-cü illərdə "Azərbalıq" Dövlət Konserninin sədri olub. Əvvəl Azərbaycan Xalq Cəbhəsində, Müsavat Partiyasında təmsil olunub. 2000 -ci ildə Müasir Müsavat Partiyasını təsis edib, partiya 2002-ci ildə dövlət qeydiyyatından keçib. Müasir Müsavat Partiyası özünü iqtidara qarşı konstruktiv müxalifət hesab edir.
Məqalə müəllifi ilə əlaqə ünvanı: [email protected]