Azərbaycan, Bakı, 24 iyun/ Trend , müxbir E.Babayev/ Azərbaycanın eks-prezidenti, Azərbaycan Xalq Cəbhəsi Partiyasının mərhum sədri Əbülfəz Elçibəyin anadan olmasının ildönümü ilə bağlı bu gün müxalifət Müsavat, Bütöv Xalq Cəbhəsi, Klassik Xalq Cəbhəsi partiyaları və "Azadlıq" bloku onun məzarını ziyarət ediblər.
Trend -un arayışı: Elçibəyin anadan olmasından 70 il ötür. O, 24 iyun 1938-ci ildə Ordubad rayonunun Kələki kəndində anadan olub. Bakı Dövlət Universitetinin (BDU) şərqşünaslıq fakültəsinin ərəb filologiyası şöbəsini bitirib. Tarix elmləri namizədi alimlik dissertasiyasını müdafiə edib. Bir müddət Misirdə tərcüməçi kimi çalışıb. BDU-da, Milli Elmlər Akademiyasında işləyib. Ötən əsrin 80-ci illərinin sonunda başlanmış Azərbaycan xalqının azadlıq hərəkatının liderlərindən biri olan Elçibəy millətçilik ittihamı ilə 1975-ci ildə Azərbaycan Dövlət Təhlükəsizlik Komitəsi tərəfindən həbs edilib. O, 1988-ci ildə Azərbaycanda başlanan xalq hərəkatına rəhbərlik edib. Elçibəy 7 iyun 1992-ci ildə Azərbaycanın prezidenti seçilib. Keçmiş sovet respublikaları arasında birinci olaraq Rusiya ordusunun Azərbaycandan çıxarılması onun hakimiyyəti dövründə baş tutub. Həmçinin ali məktəblərə test üsulu ilə qəbulun keçirilməsi, milli valyutanın yaradılması onun adı ilə bağlıdır.
Elçibəy 22 avqust 2000-ci ildə - 63 yaşında Ankarada vəfat edib.
Klassik Xalq Cəbhəsi Partiyası (KXCP) Elçibəyin məzarını ziyarətdən öncə Əzizbəyov heykəlindən Fəxri Xiyabana qədər yürüş keçirib. Yürüş insidentsiz ötüşüb.
Məqalə müəllifi ilə əlaqə ünvanı: [email protected]
