Azərbaycan, Bakı, 28 iyun / , müxbir K.Zərbalıyeva/ İyunun 28 -29- da Batumidə MDB ölkələri Daxili İşlər Nazirləri Şurasının iclası keçiriləcək. MDB İcraiyyə Komitəsinin yaydığı məlumata görə, iclasda cinayətkarlığa qarşı mübarizə sahəsində informasiya mübadiləsi haqqında Saziş layihəsi və Birlik ölkələrinin 2009-2011-ci illərdə qanunsuz miqrasiya əleyhinə əməkdaşlıq proqramı müzakirə ediləcək.
Proqram Birlik çərçivəsində yaradılmış sayca ikinci belə sənəddir. Bu sənəd MDB ölkələri Miqrasiya Orqanları Rəhbərləri Şurasının 2008-ci il 3 aprel tarixli qərarına müvafiq hazırlanıb. Əvvəlki sənədin fəaliyyət müddəti bu il başa çatır. Proqramın qəbulunda məqsəd qanunsuz miqrasiyaya qarşı mübarizə sahəsində MDB dövlətlərinin əməkdaşlığını təkmilləşdirməkdir.
Sənəddə nəzərdə tutulmuş kompleks tədbirlər miqrasiya ilə bağlı vəziyyətin təhlilinə və onun inkişaf meyllərinin proqnozuna, elmi tədqiqatların nəticələrinə və qanunsuz miqrasiyaya qarşı mübarizə təcrübəsinə, o cümlədən Birlik ölkələrinin müvafiq idarələrinin birgə fəaliyyəti sahəsində qazanılmış təcrübəyə əsaslanır. İclasda Daxili İşlər Nazirləri Şurasının üzvləri informasiya texnologiyaları sahəsində cinayətkarlığa qarşı mübarizə tədbirlərini əlaqələndirmək üçün "qaynar xətt"in açılmasını, MDB ölkələri DİN təhsil müəssisələrinin vahid informasiya bazası saytının pilot layihəsini və bir sıra başqa məsələləri müzakirə edəcəklər. Tədbirdə Azərbaycanı daxili işlər naziri Ramil Usubovun rəhbərlik etdiyi nümayəndə heyəti təmsil edir.
Müəlliflə əlaqə saxlamaq üçün elektron ünvan - [email protected]
