Azərbaycan, Bakı, 14 iyul/ Trend , müxbir E.Babayev/ Hakim Yeni Azərbaycan Partiyası (YAP) ölkədə siyasi partiyaların sərbəst toplaşma hüququnun məhdudlaşdırıldığı barədə bəyanatları qəbul etmir.
"Bu kimi iddiaların Azərbaycan gerçəkliyi ilə heç bir əlaqəsi yoxdur. "Sərbəst toplaşma azadlığı haqqında" qanunda müəyyənləşdirilmiş normalar çərçivəsində bütün ictimai və siyasi təşkilatlar sərbəst toplaşma hüququndan istifadə edirlər", bazar ertəsi Trend -a YAP sədrinin müavini və partiyanın icra katibi Əli Əhmədov deyib.
Trend -un arayışı: Azərbaycan müxalifəti ölkədə sərbəst toplaşma hüququnun məhdudlaşdırıldığını bildirir. İyulun 12-də müxalif Müsavat Partiyası sərbəst toplaşma hüququnun təmin edilməsi tələbi ilə Bakı Şəhər İcra Hakimiyyəti qarşısında piket keçirib. Partiya eyni zamanda Bakı Şəhər İcra Hakimiyyətini məhkəməyə verib.
Əhmədov bildirib ki, Azərbaycanda bəzi siyasi qüvvələr sərbəst toplaşma azadlığının məhdudlaşdırılması haqqında həqiqətəuyğun olmayan rəy formalaşdırmaq istəyirlər və bu yolla Azərbaycanın imicinə zərbə vurmaq məqsədi güdürlər. "Bir sıra müxalifət partiyaları bu niyyətlərinə çatmaq üçün "Sərbəst toplaşma azadlığı haqqında" qanunun normalarını kobud şəkildə pozaraq piketlər, aksiyalar keçirməyə cəhdlər göstərirlər. Qanunauyğun şəkildə bu cəhdlərin qarşısı alınanda isə səs-küy yaradırlar ki, guya Azərbaycanda sərbəst toplaşma azadlığı məhdudlaşdırılıb", - deyən Əhmədovun sözlərinə görə, müxalifətin belə iddia ilə çıxış etməsinin səbəbləri var. Onun fikrincə, müxalifət qanun çərçivəsində aksiyaları keçirmək üçün kifayət qədər insan resruslarına malik deyil. Ona görə də maraqlıdırlar ki, bu resursun olmadığını ört-basdır etmək üçün qanunu kobud şəkildə pozub, aksiyalar keçirməyə cəhd etsinlər.
YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 15 ildir hakim partiya olan YAP-ın indiki sədri prezident İlham Əliyevdir.
Məqalə müəllifi ilə əlaqə ünvanı: [email protected]
